ဘရာဇီးလ်တိုက်စစ်မှူး နေမာ အသင်းနှင့်အတူ လေ့ကျင့်မှု ပြန်လည်ပြုလုပ်နိုင်ပြီဖြစ်၍ စကော့တလန်နှင့်ပွဲတွင် ပါဝင်ကစားနိုင်ရန် မျှော်လင့်နေ

ဒဏ်ရာပြဿနာကြောင့် ကမ္ဘာ့ဖလားအုပ်စုပွဲစဉ်များဖြစ်သည့် မော်ရိုကို၊ ဟေတီတို့နှင့်ပွဲများတွင် ပါဝင်ကစားနိုင်ခြင်းမရှိခဲ့သည့် ဘရာဇီးလ်အသင်း၏ ဂိုးအများဆုံးစံချိန်ရှင် တိုက်စစ်မှူး နေမာသည် တနင်္ဂနွေနေ့က အသင်းနှင့်အတူ ပထမဆုံးအကြိမ် လေ့ကျင့်မှု အပြည့်အဝ ပြန်လည်ပြုလုပ်နိုင်ခဲ့ပြီဖြစ်သည်။ ၎င်းက လူမှုကွန်ရက်တွင် ပြန်လည်ကစားနိုင်တော့မည့်အပေါ် အလွန်ဝမ်းမြောက်မိကြောင်း ရေးသားခဲ့ပြီး၊ စကော့တလန်နှင့်ယှဉ်ပြိုင်ရမည့် အုပ်စုနောက်ဆုံးပွဲတွင် ပါဝင်နိုင်ရန် မျှော်လင့်နေသည်။ အသင်းဖော် ပါကေတာကလည်း နေမာ ပြန်လည်သက်သာလာမှုအပေါ် ဝမ်းမြောက်မိကြောင်းနှင့် အသင်းအတွက် အရေးပါသူဖြစ်၍ ကွင်းတွင်းသို့ အမြန်ဆုံးပြန်လာနိုင်ရန် မျှော်လင့်ကြောင်း ပြောကြားခဲ့သည်။ အသက် ၃၄ နှစ်အရွယ် နေမာအတွက် ယခု ၂၀၂၆ ကမ္ဘာ့ဖလားပြိုင်ပွဲသည် ၎င်း၏ (၄) ကြိမ်မြောက်နှင့် နောက်ဆုံးအကြိမ်အဖြစ် ဆုဖလားရယူရန် မျှော်လင့်ထားသည့် ပြိုင်ပွဲဖြစ်သော်လည်း လက်ရှိအချိန်အထိ အသင်းအတွက် ပါဝင်ကစားပေးနိုင်ခြင်း မရှိသေးပေ။