ထိုင်းနိုင်ငံတွင် အလုပ်စမတ်ခ ဘတ် ၇,၀၀၀ ကျော် ပေးခဲ့ရသည့် မြန်မာလုပ်သား ၁၉ ဦး အလုပ်ဝင်ပြီး ၁၅ ရက်အကြာတွင် အလုပ်ဖြုတ်ခံရ

ထိုင်းနိုင်ငံ၊ လယောင်မြို့နယ်တွင် အီလက်ထရောနစ်စက်ရုံ၌ အလုပ်လုပ်ကိုင်ရန် ပွဲစားဖြစ်သူအား အလုပ်စမတ်ခအဖြစ် ထိုင်းဘတ်ငွေ ၅,၀၀၀ မှ ၇,၅၀၀ အထိ ပေးဆောင်ခဲ့ရသည့် မြန်မာလုပ်သား ၁၉ ဦးသည် ဇွန်လ ၁ ရက်တွင် အလုပ်ဝင်ရောက်ခဲ့ပြီးနောက် ၁၅ ရက်အကြာတွင် အလုပ်ဖြုတ်ခံခဲ့ရကြောင်း သိရသည်။ အလုပ်ဖြုတ်ခံရမှုအပေါ် ပွဲစားဖြစ်သူက တာဝန်ယူရန် ငြင်းဆန်ခဲ့ခြင်းကြောင့် နစ်နာသူလုပ်သားများက WAG အလုပ်သမားမဟာမိတ်အဖွဲ့ထံ အကူအညီတောင်းခံခဲ့ရာ ဇွန်လ ၁၉ ရက်တွင် သက်ဆိုင်ရာမြို့နယ်ရုံး၌ ပွဲစားအား ခေါ်ယူဖြေရှင်းပေးခဲ့သဖြင့် အလုပ်သမားများ၏ စမတ်ကြေးငွေများ အားလုံး ပြန်လည်ရရှိခဲ့ပြီး လုပ်ခလစာများကိုမူ လာမည့် ဇူလိုင် ၇ ရက်တွင် ပေးချေရန် ကတိပြုချက် ရရှိခဲ့သည်။ ထိုင်းနိုင်ငံရှိ မြန်မာရွှေ့ပြောင်းလုပ်သားများအနေဖြင့် ယခုကဲ့သို့ အလုပ်သမားအခွင့်အရေး ချိုးဖောက်ခံရမှုများနှင့် မကြာခဏ ရင်ဆိုင်နေရသဖြင့် အလုပ်အကိုင်ရှာဖွေရာတွင် စိတ်ချယုံကြည်ရသည့် အေဂျင်စီများနှင့်သာ ချိတ်ဆက်ရန်နှင့် အခက်အခဲရှိပါက ခိုင်လုံသော အထောက်အထားများနှင့်အတူ သက်ဆိုင်ရာ အလုပ်သမားရုံးများတွင် တိုင်ကြားကြရန် အလုပ်သမားအရေး ကူညီပေးနေသူများက နှိုးဆော်ထားကြောင်း သိရသည်။