ဂျပန်အစိုးရ၏ ထောက်ပံ့ကြေးများကြောင့် စွမ်းအင်စျေးနှုန်း ထိန်းချုပ်နိုင်ခဲ့သဖြင့် ငွေကြေးဖောင်းပွမှုနှုန်း ပုံမှန်အတိုင်း ဆက်လက် တည်ငြိမ်နေ

ဂျပန်နိုင်ငံ၏ မေလအတွက် လတ်ဆတ်သော အစားအစာများကို ဖယ်ထုတ်ထားသည့် အခြေခံ စားသုံးသူဈေးနှုန်း အညွှန်းကိန်း (Core CPI) သည် ယခင်နှစ် ကာလတူထက် ၁.၄ ရာခိုင်နှုန်း မြင့်တက်ခဲ့ပြီး ဧပြီလကနှုန်းထားအတိုင်း ပြောင်းလဲမှုမရှိဘဲ ဆက်လက် တည်ငြိမ်နေကြောင်း ဇွန်လ ၁၉ ရက်တွင် ထုတ်ပြန်သည့် အစိုးရအချက်အလက်များအရ သိရသည်။

ဤနှုန်းထားသည် စီးပွားရေးပညာရှင်များ ခန့်မှန်းထားသည့်အတိုင်း ဖြစ်ပြီး ၂၀၂၂ ခုနှစ်နောက်ပိုင်း အနိမ့်ဆုံးအဆင့်တွင် ဆက်လက် ရှိနေခြင်းဖြစ်သည်။ ငွေကြေးဖောင်းပွမှုနှုန်းကို ဤမျှအဆင့်တွင် ထိန်းထားနိုင်ခြင်းမှာ အစိုးရက လျှပ်စစ်နှင့် ဂတ်စ်စွမ်းအင်များအပေါ် စိုက်ထုတ်ထောက်ပံ့ပေးနေသည့် ထောက်ပံ့ကြေးများ (Subsidies) ကြောင့် စွမ်းအင်ကုန်ကျစရိတ် မြင့်တက်မှုကို သိသိသာသာ ဟန့်တားပေးနိုင်ခဲ့ခြင်းကြောင့် ဖြစ်သည်။သို့သော်လည်း အီရန်စစ်ပွဲကြောင့် ကမ္ဘာ့ရေနံစိမ်းစျေးနှုန်းများ မြင့်တက်နေခြင်းနှင့် ယန်းငွေတန်ဖိုး အဆမတန် အားနည်းနေခြင်းတို့ကြောင့် သွင်းကုန်စရိတ်များ ဆက်လက် မြင့်တက်လျက်ရှိရာ၊ ဂျပန်ဗဟိုဘဏ် (BOJ) အနေဖြင့် ပြီးခဲ့သည့် ဇွန်လ ၁၆ ရက်က အတိုးနှုန်းကို ၁ ရာခိုင်နှုန်းအထိ စံချိန်တင် မြှင့်တင်ခဲ့ပြီးနောက် လာမည့် လများအတွင်း အတိုးနှုန်းကို မည်မျှအရှိန်ဖြင့် ထပ်မံတိုးမြှင့်သွားမည်နည်းဆိုသည်ကို စီးပွားရေးလုပ်ငန်းများက စောင့်ကြည့်လျက်ရှိသည်။