ဗီယက်နမ်တွင် ခိုးယူခံရသည့် ကြောင်အကောင်ရေ ၄၀၀ ကျော်ကို ရဲတပ်ဖွဲ့ ကယ်ဆယ်နိုင်ခဲ့ပြီး ပိုင်ရှင်များနှင့် ပြန်လည်ဆုံစည်းပေးလျက်ရှိ

ဗီယက်နမ်နိုင်ငံ ဟိုချီမင်းစီးတီး ရာဇဝတ်မှုနှိမ်နင်းရေးရဲတပ်ဖွဲ့သည် တောင်ပိုင်းပြည်နယ်များတစ်လျှောက် ၃ နှစ်ကြာ လှည့်လည်ကာ ကြောင်များကို လိုက်လံခိုးယူပြီး အသားပေါ်စျေးကွက်သို့ တင်ပို့နေသည့် အကြီးစား နိုင်ငံဖြတ်ကျော် ကြောင်ခိုးဂိုဏ်းတစ်ခုကို ဖြိုခွင်းကာ သံလှောင်အိမ် ၄၅ လုံးအတွင်း ပိတ်လှောင်ခံထားရသည့် အသက်ရှင်လျက် ကြောင်အကောင်ရေ ၄၀၀ ကျော်ကို ကယ်ဆယ်နိုင်ခဲ့သည်။အဆိုပါ ကြောင်များကို လက်ရှိတွင် ဟနွိုင်းအဝေးပြေးလမ်းမကြီးပေါ်ရှိ ရဲတပ်ဖွဲ့ဌာနချုပ်၌ ယာယီထိန်းသိမ်း စောင့်ရှောက်ထားပြီး ပိုင်ရှင်များက မိမိတို့၏ ပျောက်ဆုံးသွားသော အိမ်မွေးတိရစ္ဆာန်များကို လာရောက်ရှာဖွေ အတည်ပြုကာ ပြန်လည်ခေါ်ဆောင်လျက်ရှိရာ လတ်တလောတွင် ကြောင်အကောင်ရေ ၄၀ ကျော်ကို ပိုင်ရှင်များထံ လွှဲပြောင်းပေးနိုင်ခဲ့ပြီဖြစ်သည်။ ဤကယ်ဆယ်ရေးသတင်းကြောင့် ပြည်တွင်းရှိ တိရစ္ဆာန်ဆေးကုဆရာဝန်များနှင့် လုပ်အားပေးများအပြင် နိုင်ငံခြားသားများပါ လာရောက်ကာ ရဲတပ်ဖွဲ့ဝင်များနှင့် ပူးပေါင်းပြီး ကြောင်များအတွက် အစားအစာ၊ ရေ၊ လှောင်အိမ်ကျယ်များနှင့် ရာသီဥတုအပူဒဏ် သက်သာစေရန် ပန်ကာများကိုပါ လာရောက်လှူဒါန်း အကူအညီပေးနေကြသည်။ သို့သော်လည်း စုပြုံပိတ်လှောင်ခံထားရသည့် ဒဏ်ကြောင့် ကယ်ဆယ်ထားသော ကြောင်အချို့ သေဆုံးမှုများ ရှိနေသည့်အတွက် တိရစ္ဆာန်စောင့်ရှောက်ရေးအဖွဲ့များက ကျန်ရှိနေသည့် ကြောင်များ ဘေးကင်းစေရန် အချိန်ပြည့် စောင့်ရှောက်ပေးလျက်ရှိကြောင်း သိရသည်။