လာအိုနှင့် တရုတ်နိုင်ငံတို့ ကန်ဒေါ်လာ ၃.၃၁ မီလီယံ တန်ဖိုးရှိသော ဖွံ့ဖြိုးရေးစီမံကိန်းအသစ် ၇ ခုကို အတည်ပြု လက်မှတ်ရေးထိုး

လာအိုနိုင်ငံနှင့် တရုတ်နိုင်ငံတို့သည် မဲခေါင်-လန်ချန်း ပူးပေါင်းဆောင်ရွက်မှု အထူးရန်ပုံငွေ (Mekong-Lancang Cooperation Special Fund 2026) အောက်တွင် ကန်ဒေါ်လာ ၃.၃၁ မီလီယံကျော် တန်ဖိုးရှိသည့် လူမှုစီးပွားဘဝ ဖွံ့ဖြိုးတိုးတက်ရေး စီမံကိန်းအသစ် ၇ ခုကို ဇွန်လ ၁၆ ရက် (အင်္ဂါနေ့) က ဗီယင်ကျန်းမြို့တွင် အတည်ပြု လက်မှတ်ရေးထိုးခဲ့ကြသည်။အဆိုပါ စီမံကိန်း ၇ ခုတွင် အဓိကအားဖြင့် စိုက်ပျိုးရေးကဏ္ဍ၊ သစ်တောထိန်းသိမ်းရေး၊ နည်းပညာဆန်းသစ်တီထွင်မှုနှင့် ကျေးလက်ဒေသ ဆင်းရဲနွမ်းပါးမှု လျှော့ချရေး လုပ်ငန်းစဉ်များ ပါဝင်သည်။ လာအိုနိုင်ငံခြားရေးဝန်ကြီးဌာန ဒုတိယဝန်ကြီး Bounleua Phandanouvong ၏ ပြောကြားချက်အရ ယခုစီမံကိန်းများသည် ကျေးလက်နေပြည်သူများ၏ စားဝတ်နေရေးနှင့် စွမ်းဆောင်ရည်ကို မြှင့်တင်ပေးနိုင်ရုံသာမက၊ ဒေသတွင်း စဉ်ဆက်မပြတ် ဖွံ့ဖြိုးတိုးတက်ရေးအတွက် တရုတ်-လာအို နှစ်နိုင်ငံအကြား မဟာဗျူဟာမြောက် မိတ်ဖက်ဆက်ဆံရေးကို ပိုမိုခိုင်မာစေမည်ဖြစ်ကြောင်း သိရသည်။ လာအိုနိုင်ငံသည် ၂၀၁၇ ခုနှစ်မှစတင်၍ မဲခေါင်-လန်ချန်း ရန်ပုံငွေဖြင့် စုစုပေါင်း ကန်ဒေါ်လာ မီလီယံ ၅၀ ကျော် တန်ဖိုးရှိသော စီမံကိန်းပေါင်း ၉၀ ကျော်ကို အောင်မြင်စွာ အကောင်အထည်ဖော်နိုင်ခဲ့ပြီး ဖြစ်သည်။