ထိုင်းနိုင်ငံ ဘန်ကောက်မြို့တွင် မိခင်နှင့် ကွန်ဒိုငှားခကိစ္စ စကားများပြီးနောက် အမျိုးသားတစ်ဦး ရေကူးကန်ထဲ ကားမောင်းဆင်းမှုဖြစ်ပွား

ထိုင်းနိုင်ငံ ဘန်ကောက်မြို့ ပထုံဝမ်ခရိုင်ရှိ ချုလာလောင်ကွန်းတက္ကသိုလ်ဝင်းအတွင်း ဇွန်လ ၁၈ ရက် နံနက်အစောပိုင်းက အသက် ၂၉ နှစ်အရွယ် အမျိုးသားတစ်ဦးသည် မိခင်ဖြစ်သူနှင့် ကွန်ဒိုအငှားခပေးချေမှုကိစ္စ အငြင်းပွားရာမှ စိတ်ဖိစီးဒေါသထွက်ကာ တက္ကသိုလ်ဝင်းရှိ ရေကူးကန်ထဲသို့ ကားမောင်းဆင်းခဲ့သည့် ဖြစ်စဉ်တစ်ခု ဖြစ်ပွားခဲ့သည်။ နံနက် ၅ နာရီ ၄၅ မိနစ်ခန့်တွင် အဖြူရောင် Toyota Harrier အမျိုးအစား ကားတစ်စီး ရေကူးကန်ထဲသို့ နစ်မြုပ်ခဲ့ပြီး ယာဉ်မောင်းအမျိုးသားမှာ ထိခိုက်ဒဏ်ရာများ ရရှိခဲ့သော်လည်း ကယ်ဆယ်ရေးအဖွဲ့များ မရောက်မီ ရေကူးကန်ကမ်းစပ်သို့ ကိုယ်တိုင်ရေကူးတက်နိုင်ခဲ့သည်။ ၎င်းကို ပထုံဝမ်ရဲစခန်းမှ ရဲတပ်ဖွဲ့ဝင်များနှင့် ကယ်ဆယ်ရေးသမားများက ချာရွန်ခရွန်ပရာချာရက် ဆေးရုံသို့ ပို့ဆောင်ပေးခဲ့ပြီး အဆိုပါဖြစ်စဉ်ကြောင့် အခြားထိခိုက်သေဆုံးသူမရှိကြောင်း သိရသည်။စုံစမ်းစစ်ဆေးချက်များအရ ယာဉ်မောင်းသည် တစ်လလျှင် ဘတ် ၂၇,၀၀၀ မှ ၃၀,၀၀၀ ခန့် ကျသင့်သည့် ကွန်ဒိုအငှားခကို မိခင်ဖြစ်သူအား ဝိုင်းဝန်းစိုက်ထုတ်ပေးစေလိုသော်လည်း မိခင်က သဘောမတူသဖြင့် စကားများရန်ဖြစ်ခဲ့ခြင်း ဖြစ်သည်။ ဖြစ်ပွားချိန်တွင် လုံခြုံရေးဝန်ထမ်းများက တားဆီးခဲ့သော်လည်း ယာဉ်မောင်းက ကားအရှိန်မြှင့်ကာ အတားအဆီးနှင့် ခြံစည်းရိုးများကို တိုက်ဖျက်၍ ရေကူးကန်ထဲသို့ မောင်းနှင်ထိုးဆင်းခဲ့ခြင်း ဖြစ်သည်။ လက်ရှိတွင် ရဲတပ်ဖွဲ့က ယာဉ်မောင်း၏ စိတ်ကျန်းမာရေးအခြေအနေနှင့် ဖြစ်စဉ်အသေးစိတ်ကို ဆက်လက်စုံစမ်းစစ်ဆေးလျက်ရှိသည်။ ယင်းဖြစ်စဉ်နှင့်ပတ်သက်၍ လူမှုကွန်ရက်ပေါ်တွင် ကျယ်ကျယ်ပြန့်ပြန့် ဝေဖန်မှုများ ထွက်ပေါ်နေပြီး၊ အချို့က ယခုကဲ့သို့ ပြုလုပ်ခြင်းကြောင့် ကားပြင်စရိတ်၊ တက္ကသိုလ်ပိုင်ပစ္စည်း ပျက်စီးမှုလျော်ကြေးနှင့် ဥပဒေကြောင်းအရ ပြစ်ဒဏ်များမှာ မိသားစုအငြင်းပွားခဲ့သည့် ကွန်ဒိုငှားခထက် များစွာ ပိုမိုကုန်ကျနိုင်ကြောင်း ထောက်ပြပြောဆိုနေကြသည်။