မလေးရှားက တောင်တရုတ်ပင်လယ်ကို စောင့်ကြည့်ရန် ၂၄ နာရီပတ်လုံး ပျံသန်းနိုင်သည့် ANKA-S ဒရုန်း ၃ စင်းကို ရင်းဂစ် ၄၂၃.၈ သန်းဖြင့် ဝယ်ယူ

မလေးရှား ကာကွယ်ရေးဝန်ကြီး Datuk Seri Mohamed Khaled Nordin က တော်ဝင်မလေးရှားလေတပ် (RMAF) ၏ ကာကွယ်ရေးနှင့် ရေကြောင်းစောင့်ကြည့်ရေးကဏ္ဍကို မဟာဗျူဟာမြောက် မြှင့်တင်ရန်အတွက် တူရကီနိုင်ငံထုတ် ANKA-S အမျိုးအစား မောင်းသူမဲ့စစ်ဘက်သုံးဒရုန်း (UAS) ၃ စင်းကို ရင်းဂစ် ၄၂၃.၈ သန်း (ကန်ဒေါ်လာ ၉၀ သန်းနီးပါး) ဖြင့် ဝယ်ယူတပ်ဆင်လိုက်ကြောင်း ဇွန်လ ၁၇ ရက် (ယမန်နေ့) တွင် ထုတ်ပြန်ကြေညာခဲ့သည်။ ယခုဝယ်ယူမှုတွင် ဒရုန်းများအပြင် မြေပြင်ထိန်းချုပ်ရေးစခန်းများနှင့် ၂ နှစ်စာ စစ်သည်အင်အား လေ့ကျင့်ရေးအစီအစဉ်များပါ ပူးတွဲပါဝင်သည်။အဆိုပါ ANKA-S ဒရုန်းများသည် ရာသီဥတုမရွေး၊ နေ့ညမပြတ် ပေ ၃၀,၀၀၀ (၉.၁ ကီလိုမီတာခန့်) အမြင့်၌ ၂၄ နာရီထက်မနည်း အဆက်မပြတ် ပျံသန်းနိုင်စွမ်းရှိပြီး၊ ၎င်းတို့ကို လာဘွမ်လေတပ်စခန်း (Labuan Air Base) တွင် အခြေစိုက်ကာ အငြင်းပွားဖွယ်ရာဖြစ်နေသည့် တောင်တရုတ်ပင်လယ်အတွင်းရှိ မလေးရှား၏ သီးသန့်စီးပွားရေးဇုန် (EEZ) ကို စောင့်ကြည့်စစ်ဆေးသွားမည်ဖြစ်သည်။ ဝန်ကြီး Khaled ၏ ပြောကြားချက်အရ ယခုကဲ့သို့ စွမ်းဆောင်ရည်မြင့် ဒရုန်းများကို အသုံးပြုခြင်းဖြင့် ပုံမှန်တိုက်လေယာဉ်များ သို့မဟုတ် ရေတပ်သင်္ဘောကြီးများကို ကင်းလှည့်ခိုင်းခြင်းထက် လောင်စာဆီနှင့် စစ်ဆင်ရေးစရိတ် အမြောက်အမြား သက်သာစေမည့်အပြင်၊ သတင်းအချက်အလက်များကို ကြိုတင်ရယူကာ ရာဇဝတ်မှု သို့မဟုတ် ကျူးကျော်မှုများရှိသည့် နေရာများသို့ တိုက်ရိုက်ပစ်မှတ်ထား စေလွှတ်နိုင်မည်ဖြစ်၍ နိုင်ငံတော်အတွက် ထိရောက်သော "မျက်စိနှင့် နား" ဖြစ်လာမည်ဖြစ်ကြောင်း သိရသည်။