အမေရိကန်ရောက်ပြီးနောက် ပထမဆုံးအကြိမ်အဖြစ် နေမာ တစ်ဦးတည်းလေ့ကျင့်မှု စတင်ပြုလုပ်

ဘရာဇီးလ်အသင်း၏ ဝါရင့်တိုက်စစ်မှူး နေမာသည် အမေရိကန်နိုင်ငံသို့ ရောက်ရှိပြီးနောက် ပထမဆုံးအကြိမ်အဖြစ် တစ်ဦးတည်း သီးသန့်လေ့ကျင့်မှု ပြုလုပ်နိုင်ခဲ့ကြောင်း သိရသည်။ အသက် ၃၄ နှစ်အရွယ် နေမာသည် ၂၀၂၆ ကမ္ဘာ့ဖလားပြိုင်ပွဲကို ၎င်း၏နောက်ဆုံးပြိုင်ပွဲအဖြစ် ဆင်နွှဲရန် စိတ်အားထက်သန်နေသော်လည်း ခြေသလုံးကြွက်သားဒဏ်ရာကြောင့် ပြီးခဲ့သည့် မေလ ၁၇ ရက်ကတည်းက လေ့ကျင့်မှု မလုပ်နိုင်ခဲ့ဘဲ ဖြစ်နေခြင်းဖြစ်သည်။ သို့သော် ဘရာဇီးလ်နည်းပြ အန်ဆယ်လော့တီက ၎င်းကို လူစာရင်းမှ မပယ်ဖျက်ဘဲ အမေရိကန်သို့ ခေါ်ဆောင်လာခဲ့ပြီး၊ မော်ရိုကိုနှင့် ကစားခဲ့သည့် အုပ်စုအဖွင့်ပွဲတွင် အရန်ခုံ၌သာ ရှိနေခဲ့သော်လည်း အင်္ဂါနေ့ လေ့ကျင့်ရေးတွင် တစ်ဦးတည်း ပြန်လည်လေ့ကျင့်လာနိုင်ခြင်း ဖြစ်သည်။ ဘရာဇီးလ်ဘောလုံးအဖွဲ့ချုပ်က နေမာ၏ ဒဏ်ရာပြန်လည်ထူထောင်မှုမှာ နောက်တစ်ဆင့်သို့ တက်လှမ်းနိုင်ခဲ့ပြီဟု အတည်ပြုခဲ့သော်လည်း ဆေးအဖွဲ့ကမူ ၎င်းကို ရှုံးထွက်အဆင့်ရောက်မှသာ ကစားနိုင်ရန် မျှော်လင့်ထားသည်။ ပထမပွဲတွင် မော်ရိုကိုနှင့် တစ်ဂိုးစီ သရေကျခဲ့သည့် ဘရာဇီးလ်အသင်းသည် ဇွန်လ ၁၉ ရက်တွင် ဟေတီ၊ ဇွန်လ ၂၄ ရက်တွင် စကော့တလန်တို့နှင့် ဆက်လက်ယှဉ်ပြိုင်ရမည်ဖြစ်သည်။