ထိုင်းနိုင်ငံတွင် ကျောင်းသုံးပြဋ္ဌာန်းစာအုပ်များ ပြတ်လပ်မှုကြောင့် မသမာမှုရှိနိုင်ကြောင်း သတိပေးချက်ထွက်ပေါ်

ထိုင်းနိုင်ငံတစ်ဝန်းရှိ စာသင်ကျောင်းများတွင် ကျောင်းသုံးပြဋ္ဌာန်းစာအုပ်များ ပြတ်လပ်နေမှုနှင့် ပတ်သက်၍ ဘတ် ၁ ဒသမ ၄ ဘီလီယံတန်ဖိုးရှိ စာအုပ်ရိုက်နှိပ်ရေးစီမံကိန်း၌ မသမာမှုများ ရှိနိုင်ကြောင်း အထက်လွှတ်တော်အမတ် ဒေါက်တာ ပရမ်ဆပ် ပီယာယူရာက သတိပေးစွပ်စွဲခဲ့သဖြင့် ပညာရေးဝန်ကြီးဌာနက စုံစမ်းစစ်ဆေးမှုများ စတင်ဆောင်ရွက်နေကြောင်း သိရသည်။ ဇွန်လ ၁၆ ရက်က ပြုလုပ်သည့် အထက်လွှတ်တော်အစည်းအဝေးတွင် ဒေါက်တာ ပရမ်ဆပ်က မေလ ၁၅ ရက်ကတည်းက ကျောင်းများဖွင့်လှစ်ခဲ့သော်လည်း နိုင်ငံတစ်ဝန်းရှိ စာသင်ကျောင်းပေါင်း ၂,၀၀၀ ကျော်မှာ ယနေ့အချိန်အထိ ၂၀၂၆ ပညာသင်နှစ်အတွက် ကျောင်းသုံးစာအုပ်များ အပြည့်အဝ မရရှိသေးသည့် ပြဿနာနှင့်ပတ်သက်၍ ပညာရေးဝန်ကြီး ပရာဆတ် ဂျန်တာရာရွန်တွန်အား မေးမြန်းစိုးရိမ်ပူပန်ကြောင်း ထုတ်ဖော်ပြောကြားခဲ့သည်။