ကမ္ဘောဒီးယားကမြန်မာတွင်အစားအသောက်နှင့် ဘာသာရေး ခရီးသွားလုပ်ငန်းမြှင့်တင်

ကမ္ဘောဒီးယားနိုင်ငံ ခရီးသွားလာရေးဝန်ကြီးဌာနနှင့် ရန်ကုန်မြို့ရှိ ကမ္ဘောဒီးယားသံရုံးတို့သည် မြန်မာခရီးသွားများကို ပိုမိုဆွဲဆောင်နိုင်ရန်အတွက် ကမ္ဘောဒီးယား၏ အစားအသောက်ဆိုင်ရာ သံတမန်ရေးရာနှင့် ဘာသာရေးခရီးသွားလုပ်ငန်း မြှင့်တင်မည့်နည်းလမ်းများကို ဆွေးနွေးခဲ့ကြသည်။ အဆိုပါဆွေးနွေးမှုကို ခရီးသွားလာရေးဝန်ကြီး မစ္စတာ ဟောက်ဟက်က ဇွန်လ ၁၅ ရက် (မနေ့က) ရန်ကုန်မြို့သို့ လာရောက်ခဲ့သည့် ခရီးစဉ်အတွင်း ကမ္ဘောဒီးယားသံအမတ်ကြီး ချန်မာနစ်၊ သံရုံးဝန်ထမ်းများနှင့် ပြည်တွင်းရှိ ကမ္ဘောဒီးယားရင်းနှီးမြှုပ်နှံသူ ကိုယ်စားလှယ်များနှင့် တွေ့ဆုံကာ ပြုလုပ်ခဲ့ခြင်းဖြစ်သည်။ ဝန်ကြီးက ပူးပေါင်းဆောင်ရွက်မှုများ တိုးမြှင့်ပေးခြင်းနှင့် ရင်းနှီးမြှုပ်နှံသူများကို ပံ့ပိုးကူညီပေးခြင်းတို့အတွက် ကမ္ဘောဒီးယားတော်ဝင်အစိုးရ၏ ကျေးဇူးတင်ရှိမှုကိုလည်း ကိုယ်စားလှယ်များထံ ထပ်ဆင့်ပြောကြားခဲ့ကြောင်း သိရသည်။