ဂျပန်နိုင်ငံ၏ အာဏာရ လစ်ဘရယ်ဒီမိုကရက်တစ်ပါတီ (LDP) သည် လက်လီဆိုင်များ၏ ငွေကောက်ခံစနစ် (Cash register) နှင့် စာရင်းကိုင်စနစ်များ ပြင်ဆင်ရလွယ်ကူစေမည့် စားသောက်ကုန်စားသုံးခွန် ၁ ရာခိုင်နှုန်း လျှော့ချရေးအဆိုပြုချက်ကို ဘေးဖယ်ထားပြီး၊ စားသောက်ကုန်ခွန်ကို သုညရာခိုင်နှုန်း (၀%) အထိ လုံးဝပယ်ဖျက်ပေးမည့် အစီအစဉ်ကိုသာ အဓိကထား ဆက်လက်ဆွေးနွေးလျက်ရှိသည်။ LDP အခွန်မူဝါဒဆပ်ကော်မတီဥက္ကဋ္ဌ Daishiro Yamagiwa က ယခုဆွေးနွေးမှုအားလုံးသည် ပြီးခဲ့သည့် ဖေဖော်ဝါရီလ အထွေထွေရွေးကောက်ပွဲအတွင်းက ပေးအပ်ခဲ့သည့် ကတိကဝတ်အတိုင်း စားသောက်ကုန်ခွန်ကို ၂ နှစ်ကြာ သုညရာခိုင်နှုန်းအထိ လုံးဝဆိုင်းငံ့ပေးရေးအပေါ်တွင်သာ ဗဟိုပြုနေကြောင်း အတည်ပြုခဲ့သည်။လွှတ်တော်တွင်း ပါတီစုံမူဝါဒရေးရာအဖွဲ့အချို့က ၁ ရာခိုင်နှုန်းအဆင့်သို့ လျှော့ချခြင်းသည် ဆိုင်များအတွက် စနစ်ပိုင်းဆိုင်ရာပြောင်းလဲမှု နည်းပါးပြီး ပိုမိုလက်တွေ့ကျသည်ဟု ထောက်ပြထားသော်လည်း၊ LDP ပါတီဝင်အများစုကမူ ရွေးကောက်ပွဲကတိအတိုင်း အပြည့်အဝအကောင်အထည်ဖော်ရန် အလေးအနက် တိုက်တွန်းနေကြသည်။ သို့သော်လည်း စားသောက်ကုန်ခွန်ကို ၀% အထိ လျှော့ချလိုက်ပါက အစိုးရအနေဖြင့် တစ်နှစ်လျှင် အခွန်ဘတ်ဂျက် ယန်း ၅ ထရီလီယံ (ကန်ဒေါ်လာ ၃၁ ဘီလီယံခန့်) အထိ ဆုံးရှုံးရဖွယ်ရှိနေပြီး၊ ဝန်ကြီးချုပ် Sanae Takaichi ၏ အစိုးရအဖွဲ့သည် ဘဏ္ဍာရေးကို လွန်ကဲစွာ သုံးစွဲနေသည်ဟူသော စိုးရိမ်ပူပန်မှုများကို နိုင်ငံတကာရင်းနှီးမြှုပ်နှံသူများအကြား မြင့်တက်လာစေနိုင်ကြောင်း ဘဏ္ဍာရေးဝန်ကြီးဌာနနှင့် စျေးကွက်ကျွမ်းကျင်သူများက သုံးသပ်ထားသည်။
