မြန်မာနိုင်ငံဆန်စပါးအသင်းချုပ်က ဆန်စပါးစိုက်ပျိုးရေးဇုန် (REZ) စီမံကိန်း၌ ပူးပေါင်းဆောင်ရွက်ရန် ဖိတ်ခေါ်

ပြည်ပပို့ကုန် ဆန်စပါးစိုက်ပျိုးရေးဇုန် (REZ) စီမံကိန်းတွင် စိတ်ဝင်စားသူများ ပူးပေါင်းဆောင်ရွက်ကြရန် မြန်မာနိုင်ငံဆန်စပါးအသင်းချုပ် (MRF) က ဖိတ်ခေါ်ထားသည်။ စီမံကိန်းတွင် ပြည်ပပို့ကုန်ကုမ္ပဏီများ၊ တစ်ကွင်းတစ်စပ်တည်း ဧက ၃၀၀ ကို သတ်မှတ်မျိုးကွဲ ၃ မျိုးထက်မပိုဘဲ စိုက်ပျိုးနိုင်သည့် လယ်ယာကုန်ထုတ်သမဝါယမအသင်းများ၊ ကန်ထရိုက်လယ်ယာစနစ် ဆောင်ရွက်နေသည့် ကုမ္ပဏီများနှင့် တောင်သူလယ်သမားအစုအဖွဲ့များ၊ ဆန်စက်လုပ်ငန်းရှင်များနှင့် ဆန်စပါးလုပ်ငန်းလုပ်ကိုင်သည့် MSME များ ပူးပေါင်းပါဝင်နိုင်သည်။ အစိုးရ-ပုဂ္ဂလိက ပူးပေါင်းဆောင်ရွက်မှုအစီအစဉ် (PPP) အရ အကောင်အထည်ဖော်သည့် အဆိုပါစီမံကိန်းသည် ဆန်စပါးကဏ္ဍ စဉ်ဆက်မပြတ် ဖွံ့ဖြိုးတိုးတက်စေရန်နှင့် Export Value Chain မြှင့်တင်ရန် ရည်ရွယ်ခြင်း ဖြစ်သည်။ စီမံကိန်းတွင် ပါဝင်သူများကို နိုင်ငံ့စီးပွားမြှင့်တင်ရေးရန်ပုံငွေနှင့် ပို့ကုန်လုပ်ငန်းရှင်များ၏ စိုက်ပျိုးစရိတ်ချေးငွေများဖြင့် ပံ့ပိုးကူညီမည်ဖြစ်ကာ၊ ၂၀၂၆ မိုးစပါးရာသီအမှီ ပါဝင်လိုသူများအနေဖြင့် ဇွန်လကုန်နောက်ဆုံးထား၍ ဆက်သွယ်ရမည်ဖြစ်ကြောင်း သိရသည်။