ထိုင်းနိုင်ငံတွင် အမေရိကန်၏ ဖမ်းဆီးခြင်း ခံရနိုင်သဖြင့် ရုရှားနိုင်ငံသားများ မသွားရောက်ကြရန် မော်စကို သတိပေး

အမေရိကန်အစိုးရ၏ တောင်းဆိုချက်အရ ဖမ်းဆီးထိန်းသိမ်းခံရနိုင်သည့် အန္တရာယ်ရှိသောကြောင့် ထိုင်းနိုင်ငံသို့ ခရီးမသွားကြရန် ရုရှားနိုင်ငံခြားရေးဝန်ကြီးဌာနက ၎င်း၏နိုင်ငံသားများကို သတိပေးလိုက်ကြောင်း ယမန်နေ့က ထွက်ပေါ်လာသည့် သတင်းများအရ သိရသည်။ အမေရိကန် ထောက်လှမ်းရေးအေဂျင်စီများသည် ထိုင်းအာဏာပိုင်များကို ကျော်လွန်၍ ရုရှားနိုင်ငံသားများကို ဖမ်းဆီးရန် လျှို့ဝှက်စစ်ဆင်ရေးများ လုပ်ဆောင်နေပြီး ထိုင်းနိုင်ငံသည် ဝါရှင်တန်၏ အဓိကဖမ်းဆီးရာနေရာ ဖြစ်နေကြောင်း ရုရှားဘက်က စွပ်စွဲထားသည်။ ယင်းသတိပေးချက်သည် ပြီးခဲ့သည့် နိုဝင်ဘာလက ထိုင်းတွင် ဖမ်းဆီးခံခဲ့ရသည့် ရုရှားဟက်ကာဟု သံသယရှိသူ ဒန်းနစ်အိုဘရက်ဇ်ကို အမေရိကန်တရားရုံး၌ ရုံးထုတ်စစ်ဆေးပြီးနောက် ထွက်ပေါ်လာခြင်း ဖြစ်သည်။ သို့သော် ထိုင်းနိုင်ငံခြားရေးဝန်ကြီးဌာနကမူ ထိုင်းနိုင်ငံသည် လာရောက်လည်ပတ်သူ အားလုံးအတွက် ဘေးကင်းပြီး အမြဲကြိုဆိုနေကြောင်း ချက်ချင်း ပြန်လည်တုံ့ပြန် ပြောကြားခဲ့သည်။