ဘင်္ဂလားပင်လယ်အော်တွင် မုတ်သုံလေ အားကောင်းသဖြင့် ဇွန်လ တတိယပတ်အတွင်း ကမ်းရိုးတန်းနှင့် မြစ်ဝကျွန်းပေါ်ဒေသများတွင် မိုးအဆက်မပြတ် သည်းထန်စွာ ရွာသွန်းနိုင်

ဘင်္ဂလားပင်လယ်အော်အတွင်း အနောက်တောင်မုတ်သုံလေ အားကောင်းရာမှ အလွန်အားကောင်းနေခြင်းကြောင့် ရခိုင်၊ မွန်၊ ကရင်၊ ရန်ကုန်၊ ဧရာဝတီနှင့် တနင်္သာရီစသည့် ကမ်းရိုးတန်းဒေသများနှင့် မြစ်ဝကျွန်းပေါ်ဒေသများတွင် ဇွန်လ တတိယပတ်အတွင်း မိုးအဆက်မပြတ် သည်းထန်စွာ ရွာသွန်းနိုင်ကြောင်း ပြင်ပမိုးလေဝသပညာရှင် ဦးဝင်းနိုင်က သတိပေးနှိုးဆော်ထားသည်။ ထို့ပြင် ၎င်းက ဇွန်လ ၁၅ ရက်မှစတင်ကာ ဇွန်လ ၁၆ ရက်မှ ၂၂ ရက်အထိ ရက်သတ္တပတ်အတွင်း မြန်မာနိုင်ငံတစ်ဝန်းရှိ ပြည်နယ်နှင့် တိုင်းဒေသကြီးများအလိုက် ရွာသွန်းရရှိနိုင်မည့် စုစုပေါင်းမိုးရေချိန်ခန့်မှန်းချက်များနှင့် မိုးရွာသွန်းမှုဖြစ်နိုင်ခြေ အခြေအနေများကိုလည်း ထည့်သွင်းခန့်မှန်းထုတ်ပြန်ထားကြောင်း သိရသည်။