စင်ကာပူအစိုးရက ကမ္ဘာ့အဆင့်ယှဉ်ပြိုင်နိုင်စွမ်းမြှင့်တင်ရန် Standards and Conformance 2035 လမ်းပြမြေပုံကို ထုတ်ပြန်

စင်ကာပူနိုင်ငံသည် ပထဝီနိုင်ငံရေး တင်းမာမှုများ၊ ကုန်သွယ်ရေးစည်းမျဉ်းများ ကွဲပြားလာမှုနှင့် လျင်မြန်သော နည်းပညာအပြောင်းအလဲများ ရှိနေသည့် ကမ္ဘာ့စီးပွားရေးပတ်ဝန်းကျင်တွင် ပြည်တွင်းလုပ်ငန်းများ ပိုမိုယှဉ်ပြိုင်တိုးတက်နိုင်စေရန်အတွက် Standards and Conformance (S&C) 2035 လမ်းပြမြေပုံကို ဇွန်လ ၁၁ ရက်က တရားဝင်ထုတ်ပြန်ကြေညာလိုက်သည်။ Enterprise Singapore (EnterpriseSG) က ချမှတ်လိုက်သော ယခုလမ်းပြမြေပုံသည် နိုင်ငံတကာကုန်သွယ်မှုတွင် ယုံကြည်စိတ်ချရမှုနှင့် အပြန်အလှန်ချိတ်ဆက်လုပ်ဆောင်နိုင်မှု (Interoperability) တို့အတွက် အဓိကအခြေခံအဆောက်အအုံဖြစ်ပြီး၊ ဒုတိယဝန်ကြီးချုပ်နှင့် ကုန်သွယ်ရေးနှင့် စက်မှုဝန်ကြီး Gan Kim Yong က S&C ဂါလာညစာစားပွဲ၌ ထည့်သွင်းကြေညာခဲ့ခြင်း ဖြစ်သည်။ ထို့ပြင် စင်ကာပူသည် ဗီယက်နမ်၊ အင်ဒိုနီးရှားနိုင်ငံတို့နှင့် AI စံချိန်စံညွှန်းပိုင်းဆိုင်ရာ ဒေသတွင်းပူးပေါင်းဆောင်ရွက်မှု သဘောတူညီချက်များအပြင်၊ ကာဗွန်စံချိန်စံညွှန်းအဖွဲ့အစည်းများဖြစ်သည့် Gold Standard Foundation နှင့် Verra တို့နှင့်လည်း ရေရှည်တည်တံ့ခိုင်မြဲမှုဆိုင်ရာ အာမခံချက်မူဘောင်များကို ပိုမိုကောင်းမွန်အောင် လုပ်ဆောင်ရန် သဘောတူညီချက်များ လက်မှတ်ရေးထိုးခဲ့ကြောင်း သိရသည်။