ဗီယက်နမ်၌ ပစိဖိတ်သမုဒ္ဒရာအတွင်း အယ်လ်နီညို (El Niño) စတင်ဖြစ်ပေါ်လာမှုကြောင့် မိုးခေါင်ရေရှားမှုနှင့် ဆားငန်ရေဝင်ရောက်မှု အန္တရာယ်များ မြင့်တက်နေ

ဗီယက်နမ်အမျိုးသား မိုးလေဝသနှင့် ဇလဗေဒခန့်မှန်းရေးဌာန၏ ထုတ်ပြန်ချက်အရ ပစိဖိတ်သမုဒ္ဒရာအတွင်း အယ်လ်နီညိုဖြစ်စဉ် စတင်ပုံပေါ်လာပြီဖြစ်ပြီး ၎င်းသည် ၁၉၅၀ ပြည့်နှစ်နောက်ပိုင်း အပြင်းထန်ဆုံး အခြေအနေများထဲမှ တစ်ခုအဖြစ်သို့ ရောက်ရှိလာနိုင်ကြောင်း သိရသည်။ ယခု အယ်လ်နီညိုဖြစ်စဉ်သည် ၂၀၂၆ ခုနှစ် ကုန်ပိုင်းအထိ ပိုမိုအားကောင်းလာနိုင်ပြီး ၂၀၂၇ ခုနှစ် အစောပိုင်းအထိ ဆက်လက်တည်ရှိနေနိုင်ကာ အလွန်ပြင်းထန်သောဖြစ်စဉ် (Very strong event) ဖြစ်လာရန် ၆၀ မှ ၆၅ ရာခိုင်နှုန်းအထိ အလားအလာရှိနေသည်။ ဤအခြေအနေကြောင့် ဗီယက်နမ်နိုင်ငံတစ်ဝှမ်းတွင် ပုံမှန်ထက် အပူချိန်မြင့်မားခြင်း၊ အအေးလှိုင်းဖြတ်သန်းမှု နည်းပါးခြင်းနှင့် မိုးရေချိန် ၂၅ ရာခိုင်နှုန်းမှ ၅၀ ရာခိုင်နှုန်းအထိ သိသိသာသာ လျော့နည်းခြင်းတို့ကို ရင်ဆိုင်ရဖွယ်ရှိသည်။အထူးသဖြင့် ဗီယက်နမ်အလယ်ပိုင်း၊ ကုန်းမြင့်ပိုင်းဒေသများနှင့် တောင်ပိုင်းဒေသများတွင် မိုးခေါင်ရေရှားမှုနှင့် ရေပေးဝေမှုပြတ်လတ်မှု အန္တရာယ်များ သိသိသာသာ မြင့်တက်လာနိုင်ပြီး စိုက်ပျိုးရေးနှင့် နေ့စဉ်လူမှုဘဝများကို သက်ရောက်မှုရှိလာနိုင်သည်။ သို့သော်လည်း အယ်လ်နီညိုကာလအတွင်း စုစုပေါင်းမိုးရေချိန် လျော့နည်းသွားသော်လည်း ရေတိုအတွင်း မိုးသည်းထန်စွာ ရွာသွန်းသည့် အစွန်းရောက်မိုးလေဝသဖြစ်စဉ်များ (Extreme precipitation) ဖြစ်ပေါ်လာနိုင်ခြေ ရှိနေဆဲဖြစ်ရာ လျှပ်တစ်ပြက်ရေကြီးခြင်းနှင့် မြေပြိုခြင်းဘေးအန္တရာယ်များကိုပါ တစ်ပါတည်း သတိပြုရန် လိုအပ်ကြောင်း မိုးလေဝသပညာရှင်များက သတိပေးထားသည်။