ထိုင်းနိုင်ငံ၊ဘန်ကောက်တွင် မင်းသမီးကြီး၏ ရုပ်ကလာပ်တော်အား ဂါရဝပြုမည့်သူများအတွက် အခမဲ့ ကြိုပို့ဘတ်စ်ကားများ စီစဉ်

ထိုင်းတော်ဝင်မင်းသမီး ဘာဂျာကီတီယာဗာ၏ ရုပ်ကလာပ်တော်အား သွားရောက်ဂါရဝပြုမည့် ပြည်သူများအတွက် ဘန်ကောက်အများပြည်သူသယ်ယူပို့ဆောင်ရေးအာဏာပိုင်အဖွဲ့ (BMTA) က အခမဲ့ ကြိုပို့ဘတ်စ်ကား (Shuttle Bus) ၆ လိုင်း စီစဉ်ပေးထားသဖြင့် ကိုယ်ပိုင်ကားများအစား အသုံးပြုကြရန် တိုက်တွန်းထားသည်။ဂါရဝပြုလိုသူများသည် ဇွန်လ ၁၄ ရက်မှစ၍ နေ့စဉ် မနက် ၈ နာရီခွဲမှ ညနေ ၄ နာရီအထိ Sahathai Samakhom အဆောင်ရှိ ဓာတ်ပုံတော်ရှေ့တွင် ဝမ်းနည်းကြောင်း လက်မှတ်ရေးထိုးနိုင်ပြီး၊ ဇွန်လ ၂၇ ရက်မှစတင်ကာ နေ့စဉ် မနက် ၉ နာရီမှ ည ၉ နာရီအထိ Phiman Rattaya အဆောင်တွင် ရုပ်ကလာပ်တော်အား တိုက်ရိုက်ဂါရဝပြုနိုင်သည်။အခမဲ့ပြေးဆွဲပေးမည့် M1, M2, M7, M8, M9 နှင့် M16 အမြန်ဘတ်စ်ကားလိုင်းများသည် သတ်မှတ်ထားသည့် ဘူတာများနှင့် အချက်အချာကျသောနေရာများမှ နန်းတော်အနီး Sanam Luang ကွင်းပြင်သို့ မနက်ပိုင်းမှစ၍ ညနေပိုင်းအထိ ပြေးဆွဲပေးမည်ဖြစ်ကာ ကွင်းပြင်မှ နောက်ဆုံးပြန်ထွက်မည့်ကားမှာ ညနေ ၆ နာရီ (သို့မဟုတ်) လူကုန်သည်အထိ ဖြစ်သည်။ အသေးစိတ်ကို BMTA Call Center ဖုန်း ၁၃၄၈ တွင် စုံစမ်းနိုင်သည်။