ဧရာဝတီတိုင်းအတွင်း မိုးအဆက်မပြတ်ရွာသွန်းမှုကြောင့် ပုသိမ်၊ မအူပင်၊ မြန်အောင်နှင့် ဖျာပုံမြို့တို့တွင် လမ်းများရေမြုပ်ကာ မြို့ချင်းဆက်လမ်းများ ပျက်စီးနေသည်။ ပုသိမ်မြို့ ကမ်းနားလမ်းနှင့် ဈေးပိုင်းများတွင် ရေလျှံနေသလို၊ မြန်အောင်မြို့နယ်တွင်လည်း ချောင်းရေတက်လာသဖြင့် အင်ပင်-ညောင်ခြေထောက် လမ်းပိုင်းအချို့ ရေကျော်နေသည်။ထို့ပြင် ပုသိမ်-မော်တင်၊ ဖျာပုံ-အမာ၊ ဟင်္သာတ-ရန်ကုန် လမ်းပိုင်းများမှာလည်း ပျက်စီးနေပြီး အထူးသဖြင့် ဖျာပုံ-အမာလမ်းမှာ နွေရာသီကတည်းက ပျက်စီးရာမှ ယခုအခါ ပိုမိုဆိုးရွားသွားသဖြင့် ကားခနှင့် ကုန်ဈေးနှုန်းများ တက်လာမည်ကို ဒေသခံများ စိုးရိမ်နေကြသည်။လမ်းချိုင့်ခွက်များကို အချိန်ပြည့်မဖာထေးဘဲ မိုးကုန်မှပြင်ပါက ကုန်ကျစရိတ် ၃ ဆမှ ၅ ဆအထိ ပိုကုန်နိုင်သဖြင့် အချိန်နဲ့တပြေးညီ ပြုပြင်ပေးရန် လိုအပ်ကြောင်း ထောက်ပြမှုများရှိသည်။ လတ်တလောတွင် ဧရာဝတီ၊ ရန်ကုန်နှင့် ပဲခူးတိုင်းတို့၌ မိုးသည်းထန်စွာ ဆက်တိုက်ရွာသွန်းခြင်းနှင့် လေပြင်းတိုက်ခိုက်ခြင်းများ ဆက်ရှိနိုင်ကြောင်း မိုးလေဝသခန့်မှန်းချက်များအရ သိရသည်။
