ဂျပန်အစိုးရက မာကျူရီပါဝင်သော မီးချောင်းများ ထုတ်လုပ်မှု ရပ်ဆိုင်းတော့မည်ဖြစ်၍ LED သို့ ပြောင်းလဲရန် တိုက်တွန်း

ဂျပန်အစိုးရသည် မာကျူရီ (Mercury) ကြောင့် ဖြစ်ပေါ်လာနိုင်သော ကျန်းမာရေးနှင့် ပတ်ဝန်းကျင်ဆိုင်ရာ ဆိုးကျိုးများကို လျှော့ချရန်အတွက် ဖလော်ရက်ဆင့် (Fluorescent) မီးချောင်းများ ထုတ်လုပ်ခြင်းနှင့် တင်သွင်းခြင်းကို ၂၀၂၇ ခုနှစ်ကုန်တွင် အပြီးသတ် ရပ်ဆိုင်းရန် စီစဉ်နေပါသည်။ ဂျပန်အမျိုးသားနည်းပညာနှင့် အကဲဖြတ်မှုဌာန (NITE) ၏ သတိပေးချက်အရ မီးချောင်းဟောင်းများကို LED သို့ လဲလှယ်ရာတွင် မီးချောင်းတစ်ခုတည်း မဟုတ်ဘဲ မီးဆိုင်း (Fixture) တစ်ခုလုံးကိုပါ လဲလှယ်ရန် အလေးအနက် တိုက်တွန်းထားပါသည်။အသုံးပြုခဲ့သည်မှာ ၁၀ နှစ်ထက် ကျော်လွန်နေပြီဖြစ်သော မီးဆိုင်းဟောင်းများတွင် LED တပ်ဆင်ပါက အပူလွန်ကဲ၍ မီးခိုးထွက်ခြင်းနှင့် မီးလောင်ခြင်းများ ဖြစ်ပွားနိုင်သည့် အန္တရာယ်ရှိသောကြောင့် ဖြစ်သည်။ ဂျပန်နိုင်ငံသည် မီနာမာတာကွန်ဗင်းရှင်း (Minamata Convention) အရ ၂၀၂၆ ခုနှစ်မှစ၍ မာကျူရီပါဝင်သော မီးချောင်းအချို့ကို စတင်ပိတ်ပင်နေပြီး၊ ၂၀၃၀ ပြည့်နှစ်တွင် တစ်နိုင်ငံလုံး၌ LED ၁၀၀ ရာခိုင်နှုန်း အသုံးပြုရန် ရည်မှန်းထားပါသည်။ ပြည်သူများအနေဖြင့် ဘေးကင်းလုံခြုံရေးနှင့် စွမ်းအင်ချွေတာရေးတို့အတွက် စနစ်တကျ ပြင်ဆင်လဲလှယ်ကြရန် လိုအပ်ကြောင်း သိရပါသည်။