ဂျပန်ဧကရာဇ် ရှောဝါခေတ် (Showa Era) နှစ် ၁၀၀ ပြည့် အထိမ်းအမှတ် အခမ်းအနားသို့ တက်ရောက်မည်

ဂျပန်နိုင်ငံ၊တိုကျိုမြို့ရှိ Nippon Budokan ခန်းမ၌ ၁၉၂၆ ခုနှစ်တွင် စတင်ခဲ့သော ရှောဝါခေတ် (Showa Era) ၏ နှစ် ၁၀၀ ပြည့် အထိမ်းအမှတ် အခမ်းအနားကို လာမည့် ဧပြီလ ၂၉ ရက် (ရှောဝါနေ့) တွင် ကျင်းပသွားမည်ဖြစ်ပြီး ၎င်းအခမ်းအနားသို့ ဂျပန်ဧကရာဇ် နာရူဟီတို (Emperor Naruhito) တက်ရောက်မည်ဖြစ်ကြောင်း နန်းတွင်းရေးရာဦးစီးဌာနက ၂၀၂၆ ခုနှစ်၊ ဧပြီလ ၂၂ ရက်နေ့တွင် ထုတ်ပြန်ခဲ့သည်။ အဆိုပါအစိုးရဧည့်ခံပွဲသို့ ဝန်ကြီးချုပ် ဆာနာအဲ တာကာအီချီ (Sanae Takaichi) နှင့်အတူ ဥပဒေပြုရေး၊ တရားစီရင်ရေး အကြီးအကဲများလည်း တက်ရောက်၍ မိန့်ခွန်းပြောကြားကြမည်ဖြစ်သည်။ ရှောဝါခေတ်သည် ၁၉၂၆ ခုနှစ် ဒီဇင်ဘာလမှ ၁၉၈၉ ခုနှစ် ဇန်နဝါရီလအထိ ကြာမြင့်ခဲ့ပြီး ဒုတိယကမ္ဘာစစ်နှင့် စစ်ပြီးခေတ် စီးပွားရေးအရှိန်အဟုန်ဖြင့် ပြန်လည်ဦးမော့လာမှုများ အပါအဝင် ဂျပန်နိုင်ငံ၏ အလှည့်အပြောင်းဖြစ်စဉ်များစွာ ဖြစ်ပေါ်ခဲ့သည့် ကာလဖြစ်သည်။ ဤကဲ့သို့သော နှစ် ၁၀၀ ပြည့် အထိမ်းအမှတ် နိုင်ငံတော်အခမ်းအနားကို ယခင်က ၁၉၆၈ ခုနှစ်တွင် မိဂျိခေတ် (Meiji Period) အတွက် ကျင်းပခဲ့ဖူးကြောင်း သိရသည်။ ထို့ပြင် ဘဏ္ဍာရေးဝန်ကြီးဌာနအနေဖြင့်လည်း ဤနှစ် ၁၀၀ ပြည့် အထိမ်းအမှတ်အဖြစ် ရှေ့မျက်နှာပြင်တွင် ကျည်ဆန်ရထား၊ တိုကျိုတာဝါနှင့် အမြန်လမ်းမကြီးများ ပုံဖော်ထားသည့် ယန်း ၁,၀၀၀ တန် ငွေဒင်္ဂါးပြားများကို အကန့်အသတ်ဖြင့် ထုတ်ဝေသွားမည်ဖြစ်ကြောင်း သိရသည်။