ဗီယက်နမ်နိုင်ငံအတွင်း နယ်စပ်ဖြတ်ကျော် မူးယစ်ဆေးဝါးသယ်ဆောင်မှုဖြင့် လာအိုနိုင်ငံသား ၄ ဦးကို ထောင်ဒဏ်တစ်သက်တစ်ကျွန်း ချမှတ်

လာအိုနိုင်ငံမှ ဗီယက်နမ်နိုင်ငံအတွင်းသို့ မူးယစ်ဆေးဝါး ကီလိုဂရမ် ၁၄၀ ကျော် မှောင်ခိုတင်သွင်းခဲ့သည့် အကြီးစား မူးယစ်ဆေးဝါးဂိုဏ်းတစ်ခုမှ လာအိုနိုင်ငံသား ၄ ဦးကို ဟိုချီမင်းစီးတီး ပြည်သူ့တရားရုံးက ယမန်နေ့က ထောင်ဒဏ်တစ်သက်တစ်ကျွန်းစီ ချမှတ်ခဲ့ကြောင်း သိရသည်။အဆိုပါအမှုတွင် တရားခံစုစုပေါင်း ၉ ဦး ပါဝင်ပြီး လာအိုနိုင်ငံသား ၅ ဦးနှင့် ဗီယက်နမ်နိုင်ငံသား ၄ ဦးတို့ဖြစ်သည်။ လာအိုနိုင်ငံသားများဖြစ်ကြသော Thongchaleun Youkhanthone၊ Syvongphet Saiykham၊ Sisoulath Vydavone နှင့် Sivongxay Chok တို့ကို ထောင်ဒဏ်တစ်သက်တစ်ကျွန်း ချမှတ်ခဲ့ပြီး၊ ကျန်ရှိသည့် လာအိုနိုင်ငံသားတစ်ဦးကိုမူ ထောင်ဒဏ် အနှစ် ၂၀ ချမှတ်ခဲ့သည်။ ဗီယက်နမ်နိုင်ငံသား တရားခံများအနက် Nguyen Lap Son နှင့် Nguyen Duc Thinh တို့ကို သေဒဏ်ချမှတ်ခဲ့ပြီး၊ ကျန် ၂ ဦးကိုထောင်ဒဏ်တစ်သက်တစ်ကျွန်းနှင့် ထောင်ဒဏ် အနှစ် ၂၀ အသီးသီး ချမှတ်ခဲ့သည်။စုံစမ်းစစ်ဆေးချက်များအရ ဤမူးယစ်ဆေးဝါးကွန်ရက်ကို Lam Thien Hiep အမည်ရှိ ဗီယက်နမ်အမျိုးသားတစ်ဦးက နောက်ကွယ်မှ ကြိုးကိုင်ခဲ့ခြင်းဖြစ်ပြီး ၎င်းမှာ လက်ရှိတွင် လွတ်မြောက်နေဆဲဖြစ်သည်။ ၎င်းတို့အဖွဲ့သည် ၂၀၂၃ ခုနှစ်၊ အောက်တိုဘာလခန့်မှစ၍ လာအိုမှတစ်ဆင့် ဗီယက်နမ်သို့ မူးယစ်ဆေးဝါးများ အကြိမ်ကြိမ် သယ်ဆောင်ဖြန့်ဖြူးခဲ့ကြခြင်းဖြစ်သည်။ ဗီယက်နမ်အာဏာပိုင်များအနေဖြင့် လွတ်မြောက်နေသော တရားခံအား ဆက်လက်ရှာဖွေလျက်ရှိကြောင်း သတင်းတွင် ဖော်ပြထားသည်။