မန္တလေးမြို့အနီးဝန်းကျင်ရှိ သစ်ရိပ်ဝါးရိပ်ပေါများသော ချောင်းငယ်၊ မြောင်းငယ် များသို့ ရာသီဥတုပူပြင်းလာမှုကြောင့် သွားရောက်အပူရှောင်သူ ပိုမိုများပြားလာကြောင်း ဒေသခံများထံမှ သိရသည်။
သင်္ကြန်ကာလနောက်ပိုင်း မန္တလေးမြို့တွင် နေ့အပူချိန်များသိသိသာသာမြင့်တက်လာမှုကြောင့် ဒေသခံများမှာ သစ်ရိပ်၊ ဝါးရိပ်ရှိသော နေရာများတွင် အပူရှောင်နေရခြင်းဖြစ်သည်။"မနက် ၉ နာရီလောက်ဆိုရင် နေလို့ထိုင်လို့မကောင်းတော့ဘူး။ အရမ်းပူတယ်ဆိုတော့ သစ်ပင်အရိပ်တွေ ကောင်းတဲ့ ရေပိုလွှဲမြောင်းတွေတို့ ချောင်းတွေတို့ဖက်သွားရတော့တာပဲ။ နေရာတိုင်းလည်းလူတွေပြည့်နေတာ"ဟု ချမ်းအေးသာစံ မြို့နယ်မှ လုပ်ငန်းရှင်တစ်ဦးက ပြောသည်။လက်ရှိအချိန်တွင် မန္တလေးမြို့၏နေ့အပူချိန်မှာ ၄၂ စင်တီဂရိတ် အထိရှိနေပြီး ဒေသ၏ အပူချိန်အမြင့်ဆုံးဖြစ်သော မေလတွင် နေ့အပူချိန်ဆက်လက်မြင့်တက်လာဖွယ်ရှိနေသည့်အပေါ် စိုးရိမ်မှုများရှိနေကြောင်း ဒေသခံများထံမှ သိရသည်။
