တာချီလိတ်၌ GPS နှင့် Alarm တပ်ထားသည့် ဆိုင်ကယ်များကိုပါ သူခိုးများ ကျွမ်းကျင်စွာ ဖြုတ်ခိုးနေ

ရှမ်းပြည်နယ်အရှေ့ပိုင်း၊ တာချီလိတ်မြို့တွင် ဆိုင်ကယ်သူခိုးများ သောင်းကျန်းလျက်ရှိရာ နည်းပညာသုံး GPS နှင့် Alarm စနစ်များ တပ်ဆင်ထားသည့် ဆိုင်ကယ်များကိုပင် ကျွမ်းကျင်စွာ ဖြုတ်ယူခိုးယူသူများ ရှိလာနေကြောင်း သိရသည်။ ဧပြီလ ၁၄ ရက်နေ့က ဝိန်းကျောက်ရပ်ကွက်ရှိ အိမ်ငှားဆောင်တစ်ခုအတွင်းမှ ဘတ် ၆ သောင်းကျော်တန် ဆိုင်ကယ်တစ်စီးမှာ Alarm မြည်နေသည့်ကြားမှ ခဏချင်းအတွင်း ဖြုတ်ယူခိုးခံခဲ့ရပြီး၊ ခိုးယူသူများမှာ GPS စနစ်ကိုပါ ဖြုတ်ပစ်နိုင်လောက်အောင် ကျွမ်းကျင်မှုရှိကြောင်း CCTV မှတ်တမ်းများအရ သိရသည်။ အလားတူ ပါလျံ (၂) ရပ်ကွက်နှင့် ဟုံလုံဈေးအနီးတို့တွင်လည်း ဆိုင်ကယ်ခိုးယူမှုများ ဆက်တိုက်ဖြစ်ပွားနေပြီး၊ ခိုးယူသူများကို ဖမ်းဆီးရမိခြင်း မရှိသေးသဖြင့် ဒေသခံပြည်သူများအကြား လူမှုဘဝလုံခြုံရေးအတွက် စိုးရိမ်မှုများ မြင့်တက်လျက်ရှိကြောင်း သိရှိရပါသည်။