ကချင်ပြည်နယ်၊ဝိုင်းမော်မှာတရုတ်နယ်စပ်က ဝင်တဲ့ စက်သုံးဆီတွေကြောင့် ဆီပြတ်တောက်ခြင်းမရှိဟုဆို

မြန်မာနိုင်ငံနေရာအနှံ့အပြားမှာ စက်သုံးဆီတွေကို ခွဲတမ်းနဲ့အလှည့်ကျဝယ်ယူနေရချိန် ဝိုင်းမော်မြို့နယ်မှာတော့ စက်သုံးဆီတွေကို အလွယ်တကူပဲဝယ်ယူလို့ရကြောင်း ဒေသခံတွေကပြောဆိုကြပါတယ်။ တရုတ်နယ်စပ်ကနေ စက်သုံးဆီများဝင်ရောက်မှုကြောင့် စက်သုံးဆီပြတ်လပ်မှုများကို စိုးရိမ်စရာမလိုဘူးလို့ ဆိုကြပါတယ်။ တရုတ်နယ်စပ်ကန်ပိုင်တည်နဲ့ လိုင်ဇာမြို့များကနေ စက်သုံးဆီတင် ဆီဘောက်ဆာကားများ နေ့စဉ် ဝင်ရောက်တာဖြစ်တယ်လို့ သိရပါတယ်။လက်ရှိ စက်သုံးဆီစျေးနှုန်းတွေကတော့ တစ်လီတာ ကျပ် ၁၃,၀၀၀ နဲ့ တန်းစီစရာမလိုဘဲ ဆိုင်တိုင်းနီးပါးမှာ ဝယ်ယူလို့ရနေတာလို့ဆိုပါတယ်။ ဒါ့အပြင် စက်သုံးဆီ ၁ လီတာ ကျပ် (၇,၀၀၀) နှုန်းဖြင့် အချိန် ၁ နာရီခွဲအတွင်းအကန့်အသတ်တွေနဲ့ ဆီပန့်ဆိုင်တွေက အလှည့်ကျ ရောင်းချပေးမှုတွေလည်းရှိတယ်လို့သိရပါတယ်။