ဘန်ကောက်အပါအဝင် ထိုင်းနိုင်ငံတစ်ဝန်းရှိ ပြည်နယ် ၅၈ ခုတွင် PM 2.5 ဖုန်မှုန့်များ အန္တရာယ်ရှိအဆင့်သို့ မြင့်တက်

ထိုင်းနိုင်ငံ၊ ဘန်ကောက်မြို့အပါအဝင် ပြည်နယ်ပေါင်း ၅၈ ခုတွင် PM 2.5 ဖုန်မှုန့်များမှာ သတ်မှတ်ထားသည့် ဘေးကင်းလုံခြုံမှုအဆင့်ထက် ကျော်လွန်ကာ ကျန်းမာရေးကို ထိခိုက်စေနိုင်သည့်အဆင့်သို့ ရောက်ရှိနေကြောင်း နည်းပညာနှင့် အာကာသဖွံ့ဖြိုးရေးအေဂျင်စီ (Gistda) က သတင်းထုတ်ပြန်ခဲ့သည်။ အထူးသဖြင့် မြောက်ပိုင်းနှင့် အရှေ့မြောက်ပိုင်းရှိ ပြည်နယ် ၁၀ ခုတွင် ကျန်းမာရေးကို ပြင်းထန်စွာ ထိခိုက်စေနိုင်သည့် "အနီရောင်အဆင့်" သို့ ရောက်ရှိနေပြီး ချင်းရိုင်ခရိုင်တွင် အဆိုးရွားဆုံးအခြေအနေအဖြစ် တစ်ကုဗမီတာလျှင် ၉၆.၂ မိုက်ခရိုဂရမ်အထိ ရှိနေသည်။ ဘန်ကောက်နှင့် အလယ်ပိုင်းဒေသအများစုတွင် "လိမ္မော်ရောင်အဆင့်" ရှိနေသော်လည်း တောင်ပိုင်းဒေသရှိ ပြည်နယ်များတွင်မူ လေထုအရည်အသွေး ကောင်းမွန်နေဆဲဖြစ်ကြောင်း သိရှိရပါသည်။