ကမ္ဘောဒီးယားခရီးသွားလုပ်ငန်းကို ကမ္ဘာအနှံ့မြှင့်တင်ပေးရန် အန်ဂျလီနာဂျိုလီ ကတိပြု

ကမ္ဘောဒီးယားခရီးသွားလာရေးဝန်ကြီးဌာန ဝန်ကြီး ဟွော့ဟက်နှင့် MJP ဖောင်ဒေးရှင်းဥက္ကဋ္ဌ၊ ဟောလိဝုဒ်မင်းသမီး အန်ဂျလီနာဂျိုလီတို့သည် ဧပြီလ ၅ ရက်နေ့က တွေ့ဆုံခဲ့ပြီး ကမ္ဘောဒီးယားနိုင်ငံ၏ ခရီးသွားလုပ်ငန်းကို နိုင်ငံတကာသို့ ချဲ့ထွင်မြှင့်တင်ပေးရန် ဆွေးနွေးခဲ့ကြသည်။ အဆိုပါတွေ့ဆုံမှုတွင် ဂျိုလီက ကမ္ဘောဒီးယား၏ ထူးခြားဆန်းပြားသော ခရီးသွားနေရာများကို ကမ္ဘာကသိအောင် ဖော်ထုတ်ပြသသွားမည်ဟု ကတိပြုခဲ့ကာ၊ နိုင်ငံ၏ ယဉ်ကျေးမှုနှင့် သဘာဝအမွေအနှစ်များကို ထိန်းသိမ်းစောင့်ရှောက်ရင်း ခရီးသွားကဏ္ဍ မြှင့်တင်ရေးအတွက် ပူးပေါင်းဆောင်ရွက်ရန် သဘောတူခဲ့ကြသည်။အန်ဂျလီနာဂျိုလီသည် "Lara Croft: Tomb Raider" ဇာတ်ကားမှစ၍ ကမ္ဘောဒီးယားနိုင်ငံနှင့် ရင်းနှီးကျွမ်းဝင်ခဲ့သူဖြစ်ပြီး၊ နှစ်ပေါင်းများစွာအတွင်း ပညာရေး၊ ကျန်းမာရေးနှင့် သဘာဝပတ်ဝန်းကျင် ထိန်းသိမ်းရေးလုပ်ငန်းများတွင် တစိုက်မတ်မတ် ပါဝင်ကူညီပေးနေသူဖြစ်သည်။