ပဲခူးတိုင်း၊ ပြည်မြို့မှာ ယာဉ်တိုက်မှုကြောင့် အလှူမှာ ရဟန်းခံမယ့် လူငယ် ၁ ဦး ဖိတ်စာဝေပြီးမှ သေဆုံးမှု ဖြစ်ခဲ့တယ်လို့ သိရပါတယ်။ဧပြီလ ၄ ရက် မနေ့က နေ့လယ် ၁၂ နာရီခန့်က ခေတ္တရာမြို့သစ် ၆ လမ်း၊ ဘုရင့်နောင်လမ်းမကြီးပေါ်မှာ ခြောက်ဘီးကားနဲ့ ဆိုင်ကယ်တို့ မျက်နှာချင်းဆိုင် တိုက်မိရာက ဆိုင်ကယ်ပေါ်ပါ လူငယ် ၂ ဦးအနက် ၁ ဦးက နေရာမှာပဲ သေဆုံးခဲ့တယ်လို့ သိရပါတယ်။သေဆုံးသူနဲ့ ဒဏ်ရာရသူ သူငယ်ချင်း ၂ ယောက်ဟာ ဧပြီလ ၁၂ ရက်နေ့မှာ အလှူကြီးပေးကာ သာသနာ့ဘောင်ကို ဝင်ကြမယ့် မောင်ရှင်လောင်းတွေ ဖြစ်တယ်လို့ သိရပါတယ်။သေဆုံးသူဟာ အသက် ၁၆ နှစ်အရွယ် မောင်လှိုင်မင်းထွန်းဖြစ်ပြီး ခေတ္တရာမြို့သစ် ၁၃ လမ်း၊ (၃) ရပ်ကွက်ကလို့ သိရကာ အတူပါလူငယ်ဟာလည်း ဒဏ်ရာပြင်းထန်ရခဲ့တာကြောင့် ပြည်မြို့ ကုတင် ၅၀၀ ဆေးရုံကြီးမှာ ဆေးကုသခံယူခဲ့ရပြီး သတိပြန်လည်ရရှိကာ သက်သာနေပြီလို့ သိရပါတယ်။
