ထိုင်းနိုင်ငံရဲ့ ပြည်နယ် ၇၇ ခုလုံးမှာ နေရောင်ခြည်က ဦးခေါင်းပေါ်တည့်တည့်ကနေ ၉၀ ဒီဂရီ ဒေါင်လိုက်ကျရောက်တာကြောင့် အရိပ်ပျောက်သွားသလို ဖြစ်ပေါ်စေတဲ့ "Sun Overhead" နက္ခတ္တဗေဒဆိုင်ရာ ဖြစ်စဉ်တစ်ခု စတင်နေပါတယ်။ ဒီဖြစ်စဉ်ကို ဒီနေ့ ၂၀၂၆ ခုနှစ်၊ ဧပြီလ ၄ ရက်၊ မွန်းတည့် ၁၂:၁၉ နာရီမှာ တောင်ဘက်အကျဆုံးဖြစ်တဲ့ Yala ပြည်နယ်၊ Betong ခရိုင်မှာ စတင်တွေ့မြင်ခဲ့ရတာ ဖြစ်ပါတယ်။ အပြင်မှာ မတ်တပ်ရပ်နေသူတွေ ဒါမှမဟုတ် လမ်းဘေးဓာတ်တိုင်တွေရဲ့ အရိပ်ဟာ အောက်တည့်တည့်ကို ရောက်သွားတာကြောင့် အရိပ်မရှိသလိုမျိုး ထူးထူးခြားခြား မြင်တွေ့ရမှာပါ။ထိုင်းအမျိုးသား နက္ခတ္တဗေဒ သုတေသနဌာန (NARIT) ရဲ့ ထုတ်ပြန်ချက်အရ ဒီဖြစ်စဉ်ဟာ တစ်နိုင်ငံလုံးမှာ တစ်ပြိုင်နက်တည်း ဖြစ်ပေါ်တာမျိုး မဟုတ်ဘဲ ကမ္ဘာ့အဝိုင်းအဝန်း တည်ဆောက်ပုံကြောင့် တောင်ဘက်ကနေ မြောက်ဘက်ကို တဖြည်းဖြည်း ရွှေ့လျားသွားမှာ ဖြစ်ပါတယ်။ ဧပြီလကနေ မေလအတွင်း မြောက်ဘက်ကို တဖြည်းဖြည်း ဆန်တက်သွားမှာဖြစ်ပြီး မေလ ၂၂ ရက်၊ မွန်းတည့် ၁၂:၁၇ နာရီမှာတော့ မြောက်ဘက်အကျဆုံး Chiang Rai ပြည်နယ်၊ Mae Sai ခရိုင်မှာ နောက်ဆုံးတွေ့မြင်ရမှာ ဖြစ်ပါတယ်။
နေရောင်ခြည်က ဦးခေါင်းပေါ်တည့်တည့်မှာ ရှိနေတဲ့အချိန်ဟာ နေရောင်ခြည်စွမ်းအင် အမြင့်မားဆုံး ရရှိတဲ့အချိန်ဖြစ်ပေမဲ့ အဲဒီနေ့ဟာ တစ်နှစ်တာရဲ့ အပူဆုံးနေ့လို့တော့ အလိုအလျောက် သတ်မှတ်လို့ မရဘူးလို့ NARIT က ရှင်းပြထားပါတယ်။ နေ့စဉ်အပူချိန်ဆိုတာဟာ လေထုထဲမှာ စုပုံနေတဲ့ အပူရှိန်၊ တိမ်ဖုံးလွှမ်းမှု၊ မုတ်သုံလေနဲ့ မိုးရွာသွန်းမှု စတဲ့ အချက်အလက်များစွာအပေါ်မှာ မူတည်နေတာကြောင့် အရိပ်ပျောက်တဲ့နေ့နဲ့ အပူဆုံးနေ့ဟာ ထပ်တူကျချင်မှ ကျမှာဖြစ်ပါတယ်။
ဒီလို ထူးခြားတဲ့ဖြစ်စဉ်ဟာ ထိုင်းနိုင်ငံကဲ့သို့ အပူပိုင်းဇုန်အတွင်း တည်ရှိတဲ့ နိုင်ငံတွေမှာသာ တွေ့မြင်ရတာဖြစ်ပြီး တစ်နှစ်ကို နှစ်ကြိမ် ဖြစ်ပေါ်လေ့ရှိပါတယ်။ ဒုတိယအကြိမ် စက်ဝန်းကိုတော့ ဇူလိုင်လနဲ့ စက်တင်ဘာလကြားမှာ နေရောင်ခြည်က မြောက်ဘက်ကနေ တောင်ဘက်ကို ပြန်လည်ရွှေ့လျားလာချိန်မှာ ထပ်မံတွေ့မြင်ရဦးမှာပါ။ မိမိတို့ရှိရာ ပြည်နယ်အလိုက် အရိပ်ပျောက်မယ့် အချိန်အတိအကျကို သိရှိလိုရင်တော့ NARIT ရဲ့ ဝက်ဘ်ဆိုက်မှာ ဝင်ရောက်ကြည့်ရှုနိုင်တယ်လို့ သိရပါတယ်။
