မြန်မာနိုင်ငံမှ ရွှေ့ပြောင်းလာကြသူများက ချင်းမိုင်စီးပွားရေးကို အရှိန်မြှင့်တင်ပေးနေဟု ထိုင်းသတင်းဌာန ဖော်ပြ

Surin Pitsuwan ဖောင်ဒေးရှင်း၏ သုတေသနအစီရင်ခံစာအရ မြန်မာနိုင်ငံမှ လူလတ်တန်းစား ရွှေ့ပြောင်းနေထိုင်သူအသစ်များသည် ချင်းမိုင်မြို့၏ ဝန်ဆောင်မှုကဏ္ဍအသီးသီးတွင် ရင်းနှီးမြှုပ်နှံမှုများ ပြုလုပ်ခြင်းဖြင့် မြို့၏စီးပွားရေးကို မြှင့်တင်ပေးလျက်ရှိကြောင်း သိရသည်။Surin Pitsuwan ဖောင်ဒေးရှင်း၏ လေ့လာမှုအရ ၂၀၂၅ ခုနှစ် လယ်ပိုင်းအထိ မြန်မာလူလတ်တန်းစား အနည်းဆုံး ၆,၀၀၀ ခန့်သည် ချင်းမိုင်မြို့တွင် အခြေချနေထိုင်လျက်ရှိပြီး၊ နိုင်ငံရေးမတည်ငြိမ်မှုနှင့် ၂၀၂၄ ခုနှစ်တွင် စစ်မှုထမ်းဥပဒေကို ကျင့်သုံးလာခြင်းတို့ကြောင့် သိသိသာသာ မြင့်တက်လာခြင်းဖြစ်သည်။ယခင်က ရွှေ့ပြောင်းနေထိုင်မှုပုံစံများမှာ ကျွမ်းကျင်မှုနည်းပါးသည့် အလုပ်သမားများသာ အများစုဖြစ်သော်လည်း၊ ယခုရောက်ရှိလာသူသစ်များတွင် ပညာတတ်ကျွမ်းကျင်သူများ၊ လုပ်ငန်းရှင်များ၊ ကျောင်းသားများနှင့် ဒစ်ဂျစ်တယ်နည်းပညာဖြင့် အလုပ်လုပ်ကိုင်သူများ ပါဝင်လာသည်။ ၎င်းတို့အနက် အများစုမှာ တက္ကသိုလ်ဘွဲ့ရရှိထားသူများဖြစ်ပြီး ငွေကြေးအရင်းအနှီးနှင့် နိုင်ငံတကာအတွေ့အကြုံများကိုပါ တစ်ပါတည်း ယူဆောင်လာကြသူများဖြစ်သည်။မြန်မာရွှေ့ပြောင်းနေထိုင်သူများသည် ချင်းမိုင်ခရိုင် စုစုပေါင်းထုတ်ကုန်၏ ၇၀ ရာခိုင်နှုန်းကျော်ရှိသော ဝန်ဆောင်မှုအခြေပြု စီးပွားရေးကဏ္ဍတွင် သိသိသာသာ ပါဝင်ပံ့ပိုးလျက်ရှိသည်။ ချင်းမိုင်မြို့၏ စီးပွားရေးတန်ဖိုးမှာ ဘတ် ၂၈၅ ဘီလီယံ (အမေရိကန်ဒေါ်လာ ၈ ဘီလီယံ) ခန့်ရှိပြီး ခရီးသွားလုပ်ငန်း၊ ကျန်းမာရေးစောင့်ရှောက်မှုနှင့် ပညာရေးကဏ္ဍများအပေါ် များစွာမှီခိုနေရကာ ယင်းကဏ္ဍများတွင် မြန်မာနိုင်ငံသားအသစ်များ ပိုမိုတက်ကြွစွာ ပါဝင်လာကြသည်။