ဝန်ကြီးချုပ် အနုတင် ချာန်ဝီရာကူးလ် ဦးဆောင်သော ထိုင်းအစိုးရအဖွဲ့သစ်သည် လာမည့်သင်္ကြန်ရုံးပိတ်ရက်ရှည်အတွင်း ခရီးသွားလာမှု မြင့်တက်လာမည့်အပေါ် လောင်စာဆီပြတ်လပ်မည်ကို စိုးရိမ်နေသည့် အများပြည်သူအား အားပေးနှစ်သိမ့်လိုက်ပြီး ဆီအလုံအလောက်ရှိကြောင်း အတည်ပြုပြောကြားလိုက်သည်။ အရှေ့အလယ်ပိုင်းစစ်ပွဲကြောင့် စက်သုံးဆီရရှိနိုင်မှုအပေါ် စိုးရိမ်မှုများရှိနေသော်လည်း အစိုးရအနေဖြင့် ဖြန့်ဖြူးမှုကွင်းဆက်များကို အရှိန်မြှင့်တင်ဆောင်ရွက်နေပြီး ဝန်ကြီးချုပ်ကိုယ်တိုင် အနီးကပ်ကြီးကြပ်နေကြောင်း သိရသည်။သတ်မှတ်ထားသည့် အစီအစဉ်များအရ လက်ကားရောင်းချသူများထံ တစ်နေ့လျှင် လီတာ ၇ သန်း ထောက်ပံ့ပေးသွားမည်ဖြစ်ပြီး၊ လောင်စာဆီတင်ကားများကို ဝယ်လိုအားများသည့်ဒေသများ၌ အရန်သင့်ထားရှိရန် ညွှန်ကြားထားသည်။ ထို့ပြင် သန့်စင်ပြီးလောင်စာဆီများ ပိုမိုမြန်ဆန်စွာ တင်သွင်းနိုင်ရန်အတွက် အရန်လောင်စာထားရှိမှု လိုအပ်ချက်ကို ၃ ရာခိုင်နှုန်းမှ ၁ ရာခိုင်နှုန်းသို့ လျှော့ချခွင့်ပြုလိုက်သည်။ ဧပြီလတစ်လတည်းအတွင်း ထိုင်းရေပြင်သို့ ရေနံစည်ပေါင်း ၂၄ သန်းကျော် ရောက်ရှိလာမည်ဖြစ်ပြီး မေလအထိ စုစုပေါင်း ၃၆ သန်းကျော် ရောက်ရှိရန် မျှော်မှန်းထားကြောင်း သိရှိရပါသည်။
