မြန်မာနိုင်ငံအတွင်း လျှပ်စစ်သုံးယာဉ်များ အသုံးပြုမှု မြှင့်တင်ရန်အတွက် ပေးအပ်ထားသည့် လမ်းအသုံးပြုခ ကင်းလွတ်ခွင့်ကာလသည် ၂၀၂၆ ခုနှစ်၊ မတ်လ ၃၁ ရက်နေ့တွင် ကုန်ဆုံးတော့မည်ဖြစ်သဖြင့် ၂၀၂၆ ခုနှစ်၊ ဧပြီလ ၁ ရက်နေ့မှစတင်ကာ လျှပ်စစ်သုံးယာဉ် (EV) အားလုံး လမ်းအသုံးပြုခ ပေးဆောင်ရတော့မည်ဖြစ်ကြောင်း သိရသည်။လမ်းဦးစီးဌာန၏ ထုတ်ပြန်ချက်အရ လျှပ်စစ်သုံးယာဉ်များ၊ ယာဉ်အပိုပစ္စည်းများနှင့် ဆက်စပ်ပစ္စည်းများအပေါ် လမ်းအသုံးပြုခ ကင်းလွတ်ခွင့်ပြုထားသည့် အစီအစဉ်မှာ သတ်မှတ်ကာလ ပြည့်မြောက်ခဲ့ပြီ ဖြစ်သည်။ သို့ဖြစ်ပါ၍ ၂၀၂၆-၂၀၂၇ ဘဏ္ဍာနှစ် စတင်သည့် ဧပြီလ ၁ ရက်နေ့မှစ၍ အောက်ပါအတိုင်း ကောက်ခံသွားမည်ဖြစ်သည် -
ရန်ကုန်-မန္တလေး အမြန်လမ်းမကြီး: သတ်မှတ်ထားသော အမြန်လမ်းအသုံးပြုခ နှုန်းထားများအတိုင်း ပေးဆောင်ရမည်။အခြားလမ်းပိုင်းများ: လမ်းဦးစီးဌာနမှ စီမံခန့်ခွဲသည့် အခြားလမ်းပိုင်းများတွင် ဖြတ်သန်းပါက သတ်မှတ်ထားသော ယာဉ်အမျိုးအစား (၂၂) မျိုးအလိုက် အကျုံးဝင်သည့် နှုန်းထားများအတိုင်း ပေးဆောင်ရမည်။အဆိုပါ အသိပေးချက်ကို အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့ က တရားဝင် ထုတ်ပြန်ထားခြင်း ဖြစ်သည်။ EV အသုံးပြုသူများအနေဖြင့် လာမည့် ဧပြီလ ၁ ရက်နေ့မှစတင်ကာ ခရီးစဉ်များ သွားလာရာတွင် လမ်းအသုံးပြုခများ ကြိုတင်ထည့်သွင်း တွက်ချက်ထားရန် လိုအပ်မည် ဖြစ်သည်။
