နေပြည်တော်ဒေသရှိမြို့ပေါ်ရပ်ကွက်များတွင် ခေတ်ကာလအရ ကုန်စျေးနှုန်းများကြီးမြင့်မှုမကြောင့် နံနက်အစောစာများ အတွက် ငွေကုန်ကြေးကျသက်သာရန် ကြိုးပမ်းလုပ်ဆောင်သူများလာရာမှ ကောက်ညှင်းပေါင်း၊ ပဲပေါင်းစျေးသည်များမှာ အရောင်းအဝယ်ကောင်းလာပြီး ပိုမိုအလုပ်ဖြစ်လာကြောင်း သိရသည်။အဆိုပါစျေးသည်များမှာ ယခင်လို ရပ်ရွာအတွင်းလှည့်လည်ရောင်းချစရာမလိုတော့ဘဲ လမ်းထိပ်လမ်းဆုံနေရာများတွင် အထိုင်ချ၍ ရောင်းချခြင်းများဖြင့်လုပ်ဆောင်လာသလို တွင်ကျယ်စွာရောင်းချလာရခြင်းလည်းဖြစ်သည်။ယခုအချိန်တွင် အရာရာစျေးနှုန်းများကြီးမြင့်နေသည့်အတွက် ယခင်က နံနက်အစောစာအတွက် အကြော်မှာ တစ်ခု ၂၅၀ သာ ကျသင့်ပြီး ၁၀၀၀ ဖိုး လေးခုရသော်လည်း ယခုအခါ စမူဆာ(အသေး) တစ်ခု ၃၀၀ ကျပ်၊ လက်ဖက်ရည်ပါဆယ် ၂,၅၀၀-၃,၀၀၀ ကျပ်ကြား၊ အီကြာကွေး တစ်ချောင်း ၇၀၀ ကျပ် စသည်ဖြင့် ကျသင့်လာလျက်ရှိကြောင်း သိရသည်။
