ဗီယက်နမ်နိုင်ငံ၏ လျှပ်စစ်စွမ်းအင်လိုအပ်ချက် သိသိသာသာ မြင့်တက်လာနိုင်ကြောင်း ခန့်မှန်း

ဗီယက်နမ်နိုင်ငံ၏ စီးပွားရေး ပြန်လည်ဦးမော့လာမှုနှင့်အတူ စက်မှုကဏ္ဍတိုးချဲ့မှုများကြောင့် ရှေ့လာမည့်ကာလများတွင် လျှပ်စစ်စွမ်းအင်လိုအပ်ချက် အရှိန်အဟုန်ဖြင့် မြင့်တက်လာမည်ဟု ခန့်မှန်းထားပြီး၊ စွမ်းအင်ဖူလုံစေရန်အတွက် ဂျာမနီနိုင်ငံ၏ အကူအညီဖြင့် စွမ်းအင်ကူးပြောင်းမှုဆိုင်ရာ စီမံကိန်းများကို ဆောင်ရွက်နေကြောင်း မတ်လ ၂၈ ရက်နေ့တွင် ထုတ်ပြန်ခဲ့သည်။ အထူးသဖြင့် နေရောင်ခြည်စွမ်းအင်သုံးစနစ် (Rooftop Solar) နှင့် ဘက်ထရီစွမ်းအင်သိုလှောင်မှုစနစ် (BESS) များကို မြှင့်တင်ဆောင်ရွက်သွားမည်ဖြစ်ပြီး၊ ဟိုချီမင်းစီးတီးတွင်လည်း အမေရိကန်ဒေါ်လာ ၇၁၈ သန်းတန်ဖိုးရှိ LNG လျှပ်စစ်ဓာတ်အားပေးစက်ရုံတစ်ခုကို စတင်တည်ဆောက်နေပြီဖြစ်သည်။ ယခုကဲ့သို့ စွမ်းအင်အရင်းအမြစ်သစ်များ တိုးချဲ့ခြင်းမှာ လျှပ်စစ်ဓာတ်အား ပြတ်တောက်မှုမရှိစေရန်နှင့် စနစ်တကျ ပေါင်းစပ်ညှိနှိုင်းနိုင်ရန် ရည်ရွယ်ခြင်းဖြစ်ကြောင်း သတင်းတွင် ဖော်ပြထားပါသည်။