ရွှေမော်ဓောစေတီတော်မြတ်ကြီး၏ ဗုဒ္ဓပူဇနိယပွဲတော်စတင်

(၂,၆၀၈) နှစ် ရှိလာပြီဖြစ်သည့်  ပဲခူးမြို့ရှိ ဆုတောင်းပြည့်ရွှေမော်ဓောစေတီတော်မြတ်ကြီး၏ ဗုဒ္ဓပူဇနိယပွဲတော်ကို ပဲခူးတိုင်းအစိုးရအဖွဲ့မှကြီးမှူး၍ မတ် ၂၇ ရက် ညနေပိုင်းက စတင်ဖွင့်လှစ်ခဲ့သည်။ဗုဒ္ဓပူဇနိယပွဲတော်ဖွင့်ပွဲအား စေတီတော်မြတ်ကြီး၏ ဩဝါဒါစရိယဆရာတော်ကြီးများကြွရောက်တော်မူကာ ပဲခူးတိုင်းဝန်ကြီးချုပ်ဦးမျိုးဆွေဝင်းတက်ရောက်ကြည် ညိုပူဇော်ပြီး ဆရာတော်ကြီးများထံမှ သီလခံယူဆောက်တည်ကာ လှူဖွယ်ဝတ္ထုပစ္စည်းများကိုဆက်ကပ်လှူဒါန်း၍ လှူဒါန်းမှုအစုစုအတွက်ရေစက်သွန်းချအမျှ ပေးဝေကာ တိုင်းဝန်ကြီးချုပ်မှ မီးခလုတ်နှိပ်၍ စေတီတော်မြတ်ကြီးအား လျှပ်စစ်မီးများထွန်းညှိပူဇော်ပေးခဲ့သည်။စေတီတော်မြတ်ကြီး၏ ဗုဒ္ဓပူဇနိယပွဲတော်အား မတ် ၂၇ ရက်မှ ဧပြီ ၅ ရက်အထိ (၁၀) ရက်တိုင်စည်ကားသိုက်မြိုက်စွာကျင်းပသွားမည်ဖြစ်ကာ ဧပြီ ၁ ရက်၌ သံဃာတော် (၅၀၀) ပါးအား ဆွမ်းဆန်တော်နှင့် လှူဖွယ်ပစ္စည်းများလောင်းလှူပူဇော်သွားမည်ဖြစ်သည်။