လုယက်ပြန်ပေးဆွဲမှုတွေ မကြာခဏဖြစ်နေတာကြောင့် ငွေကြေးတတ်နိုင်သူတွေ ပခုက္ကူမြို့ပေါ်ကနေ ပြောင်းရွေ့နေ

မကွေးတိုင်း၊ ပခုက္ကူမြို့မှာ လုယက်မှုတွေ မကြာခဏဖြစ်ပေါ်နေပြီး ငွေကြေးပြည့်စုံတဲ့ တချို့လုပ်ငန်းရှင်တွေဟာ တခြားမြို့တွေကို ရွေ့ပြောင်းနေထိုင်နေကြတယ်လို့ သိရပါတယ်။မတ်လ ၂၆ ရက် မနေ့က နေ့လယ်ပိုင်းမှာ ပခုက္ကူမြို့ မြို့မလမ်းပေါ် မျက်မမြင်ကျောင်းအနီးက “တောင်ဇလပ်” စက်သုံးဆီအရောင်းဆိုင်ကို လက်နက်ကိုင်ဆောင်ထားတဲ့ လူ ၄ ဦးက ဓားပြတိုက် လုယက်ခဲ့ပြီး လူကိုပါ ဓားနဲ့ထိုးမှု ဖြစ်ပွားခဲ့တယ်လို့ သိရပါတယ်။ပြီးခဲ့တဲ့ မတ်လ ၂၃ ရက်နေ့ နေ့လယ် ၂ နာရီခန့်ကလည်း ပခုက္ကူမြို့၊ အမှတ်(၄) ရပ်ကွက်၊ နေသူရိန်လမ်းပေါ် မြို့မရဲစခန်းနဲ့ ကပ်လျက် “မြမြင့်မိုရ်” ဆေးခန်းကို ဆိုင်ကယ် ၂ စီးနဲ့ အမျိုးသား ၄ ဦး ရောက်ရှိလာပြီး ပခုက္ကူ အထွေထွေရောဂါကုဆေးရုံကြီးရဲ့ လက်ထောက်ဆရာဝန် ဒေါက်တာ ဟိန်းနေထွန်းကို လက်ထိပ်ခတ်ကာ ဖမ်းဆီးသွားခဲ့တယ်လို့ သိရပါတယ်။