ရန်ကုန်မြို့ပတ်ရထားလမ်းပိုင်းတွင် ဘက်ထရီလျှပ်စစ်စက်ခေါင်းဖြင့် စတင်ပြေးဆွဲမည်

ရန်ကုန်မြို့ပတ်ရထားလမ်းပိုင်းတွင် ဘက်ထရီလျှပ်စစ်စက်ခေါင်းအသုံးပြု၍ ပြေးဆွဲခြင်းကို ၂၀၂၆ ခုနှစ်၊ မတ်လ ၂၅ ရက် နံနက်ပိုင်းမှစတင်ကာ ရန်ကုန်ဘူတာကြီး၌ အခမ်းအနားဖြင့် ဖွင့်လှစ်ပြေးဆွဲသွားမည်ဖြစ်ကြောင်း မြန်မာ့မီးရထားမှ သိရသည်။ အဆိုပါ ရထားတွဲဆိုင်းတွင် လူစီးတွဲ ၄ တွဲနှင့် ဘရိတ်တွဲ ၁ တွဲ ပါဝင်မည်ဖြစ်ပြီး ဘက်ထရီလျှပ်စစ်စက်ခေါင်း အသုံးပြုခြင်းကြောင့် ပုံမှန်ဒီဇယ်စက်ခေါင်းနှင့် နှိုင်းယှဉ်ပါက တစ်ရက်လျှင် စက်သုံးဆီစရိတ် ကျပ် ၆ သိန်းကျော် သက်သာစေမည်ဖြစ်သည်။ မြန်မာ့မီးရထားအနေဖြင့် ၂၀၂၅ ခုနှစ် နိုဝင်ဘာလမှစတင်ကာ နေပြည်တော်-မန္တလေး လေအိတ်ရထားခရီးစဉ်တွင်လည်း ဘက်ထရီလျှပ်စစ်စက်ခေါင်းများကို အောင်မြင်စွာ အသုံးပြုပြေးဆွဲလျက်ရှိကြောင်း သိရှိရပါသည်။