ရခိုင်ပြည်နယ် မောင်တောမြို့နယ်၊ အောင်သုခကျေးရွာတွင် မတ်လ ၁၆ ရက်နေ့ ညနေခင်းအချိန်တွင် ကလေးငယ်သည် အိမ်အနီးတွင် ကစားနေစဉ် ပျောက်ဆုံးသွားခဲ့ပြီး မိဘများက ရပ်ရွာအုပ်ချုပ်ရေးအဖွဲ့ထံ အကြောင်းကြားခဲ့ကြောင်း သိရသည်။ ထို့နောက် ရွာသူရွာသားများနှင့် ပူးပေါင်း၍ ရှာဖွေရာ ညနေ ၇ နာရီကျော်တွင် ကျေးရွာအတွင်း လမ်းဘေးတစ်နေရာ၌ ဂုန်နီအိတ်ဖြင့် ထုပ်ထားသော ကလေးငယ်၏ ရုပ်အလောင်းကို တွေ့ရှိခဲ့သည်။ရုပ်အလောင်းတွင် အဓမ္မပြုကျင့်ခံထားရသည့် လက္ခဏာများ တွေ့ရှိရပြီး သတ်ဖြတ်ခံထားရသည်ဟု ယူဆရကြောင်း ဒေသခံများက ပြောသည်။ ထို့အပြင် ကလေးငယ်၏ အဝတ်အစားများကို သံသယရှိသူများ၏ နေအိမ်အတွင်းရှိ အိမ်သာတွင် စွန့်ပစ်ထားခြင်း၊ မြေတူးထားသည့် လက္ခဏာများပါ တွေ့ရှိရသဖြင့် အလောင်းဖျောက်ရန် ကြိုးပမ်းခဲ့ကြောင်းလည်း ခန့်မှန်းနေကြသည်။လက်ရှိတွင် ဖြစ်စဉ်နှင့်ပတ်သက်၍ သံသယရှိသူ ၃ ဦးကို သက်ဆိုင်ရာအာဏာပိုင်များက ထိန်းသိမ်းစစ်ဆေးနေပြီး ထိုသူများအနက် အသက် ၁၄ နှစ်အရွယ် လူငယ်တစ်ဦးလည်း ပါဝင်ကြောင်း သိရသည်။
