ထိုင်း၊ဘန်ကောက်မြို့တော်အုပ်ချုပ်ရေးအဖွဲ့ (BMA) က နွေရာသီမှာ အပူချိန်မြင့်မားတဲ့အတွက် "အအေးပေးစင်တာ" ၃၀၄ ခု ကို ဖွင့်လှစ်လိုက်ပါတယ်။ ဘန်ကောက်မြို့တော်ဝန် Chadchart Sittipunt က မတ်လ ၁၆ ရက်နေ့မှာ Phra Nakhon ခရိုင်မှာရှိတဲ့ Thewet အပန်းဖြေစင်တာမှာ တရားဝင် စတင်ဖွင့်လှစ်ပေးခဲ့ပါတယ်။ အအေးပေးစင်တာတွေမှာ လေအေးပေးစက်တပ်ဆင်ထားတဲ့ အခန်းတွေ၊ ဒေသခံတွေအတွက် လုံလောက်တဲ့ ထိုင်ခုံတွေနဲ့ အပူဒဏ်ကို ရှောင်ရှားချင်သူတိုင်းအတွက် အခမဲ့ သောက်ရေတွေ စီစဉ်ပေးထားပါတယ်။
၂၀၂၄ ခုနှစ်က စံချိန်တင် အပူချိန်တွေကို ကျော်လွန်ပြီး ၂၀၂၆ ခုနှစ် နွေရာသီမှာ ပိုမိုပူပြင်းလာနိုင်တယ်လို့ ကျွမ်းကျင်သူတွေက သတိပေးပြီးနောက် မြို့တစ်ဝန်းမှာ အအေးပေးစင်တာတွေ ဖွင့်လှစ်ဖို့ ဆုံးဖြတ်ခဲ့တာ ဖြစ်ပါတယ်။ အဲဒီစင်တာတွေကို မြို့တစ်ဝန်းမှာရှိတဲ့ စာသင်ကျောင်းတွေ၊ သက်မွေးဝမ်းကျောင်း သင်တန်းကျောင်းတွေ၊ ပြည်သူ့ကျန်းမာရေးစောင့်ရှောက်မှု ဌာနတွေ၊ ယဉ်ကျေးမှု၊ အားကစားနဲ့ ခရီးသွားလာရေး ဝန်ဆောင်မှုစင်တာတွေနဲ့ ဘန်ကောက်မြို့က ခရိုင်ရုံး ၅၀ လုံးမှာ အများဆုံး ဖွင့်လှစ်ထားပါတယ်။အအေးပေးစင်တာတွေ အပြင် BMA က ပန်းခြံငယ်တွေနဲ့ အဓိက ပန်းခြံကြီးတွေမှာ လာရောက်လည်ပတ်သူတွေ "အပူဒဏ်သက်သာစေမယ့် နေရာ" ၁၇၈ ခုကိုလည်း ဖွင့်လှစ်ထားပါတယ်။ ဒါ့အပြင် ပုဂ္ဂလိကကဏ္ဍနဲ့ ပူးပေါင်းပြီး အခမဲ့ ရေဖြည့်နိုင်တဲ့ နေရာပေါင်း ၂၈၀၀ ကျော်ကိုလည်း တပ်ဆင်ပေးထားပါတယ်။မြို့တော်စည်ပင်သာယာရေးအဖွဲ့အနေနဲ့ အအေးပေးစင်တာတွေကို မလာရောက်နိုင်တဲ့ သက်ကြီးရွယ်အိုတွေနဲ့ အိပ်ရာထဲ လဲနေတဲ့ လူနာတွေ အပါအဝင် ထိခိုက်လွယ်တဲ့ ဒေသခံတွေကို အထူးဂရုစိုက် ဆောင်ရွက်ပေးနေပါတယ်။ အပူဒဏ်ကို ရင်ဆိုင်ဖို့ စေတနာ့ဝန်ထမ်းတွေနဲ့ ဒေသတွင်း ပြည်သူ့ကျန်းမာရေးအဖွဲ့တွေက အိမ်တိုင်ရာရောက် သွားရောက်ကြည့်ရှုပေးသွားမှာ ဖြစ်ပါတယ်။ BMA က AirBKK အက်ပ်နဲ့ သူတို့ရဲ့ ဝဘ်ဆိုက်ကနေတစ်ဆင့် အပူအညွှန်းကိန်း သတိပေးချက်တွေနဲ့ ဘေးကင်းလုံခြုံရေး သတိပေးချက်တွေကိုလည်း ထုတ်ပြန်ပေးသွားမှာ ဖြစ်ပါတယ်။
