ရွှေဆိုင်များ လက်ဝတ်ရတနာအလျော့တွက်လက်ခ အသစ်သတ်မှတ်မှု ထုတ်ပြန်

ရန်ကုန်တိုင်းရွှေလုပ်ငန်းရှင်များအသင်း (YGEA) သည် ရွှေဆိုင်များတွင် လက်ဝတ်ရတနာ ပြုလုပ်ရာ၌ ကောက်ခံမည့် အလျော့တွက်လက်ခ နှုန်းထားများကို မတ်လ ၁၁ ရက်နေ့တွင် အသစ်သတ်မှတ် ထုတ်ပြန်လိုက်ပြီး၊ အဆိုပါ ထုတ်ပြန်ချက်အရ ရွှေဆွဲသီး၊ ရွှေနားကပ်၊ ရွှေလက်စွပ်နှင့် ရွှေဆွဲကြိုး အစရှိသည့် လက်ဝတ်ရတနာ အမျိုးအစားနှင့် အလေးချိန်အပေါ် မူတည်၍ နှုန်းထားများ ခွဲခြားသတ်မှတ်ထားကြောင်း သိရသည်။ သတ်မှတ်ချက်သစ်တွင် ရွှေဆွဲသီး ၂ ပဲတင်နှင့်အောက်အတွက် အလျော့တွက်လက်ခ ၁ ပဲ ၁ ရွေး၊ ရွှေဆွဲကြိုး ၁ ကျပ်သားတင်နှင့်အောက်အတွက် ၅ ပဲ ၆ ရွေး စသည်ဖြင့် သတ်မှတ်ထားရာ၊ ရွှေထည်ပစ္စည်းအချို့တွင် ပစ္စည်းတန်ဖိုး၏ ထက်ဝက်နီးပါးအထိသော်လည်းကောင်း၊ ၁ ကျပ်သားလျှင် ၁ မတ်ခွဲသားနီးပါးအထိသော်လည်းကောင်း အလျော့တွက်လက်ခ ပေးဆောင်ရနိုင်သည့် အခြေအနေဖြစ်ကြောင်း သိရသည်။