တာချီလိတ်၊ ကျိုင်းတုံ၊ မိုင်းဆတ်နှင့် မိုင်းတုံမြို့များမှ ပြေးဆွဲနေသည့် မော်တော်ယာဉ်များသည် စက်သုံးဆီဝယ်ယူရမှု ခက်ခဲလာခြင်းနှင့် အပြင်ဈေးဖြင့် ဝယ်ယူနေရခြင်းတို့ကြောင့် ယာဉ်စီးခများကို တိုးမြှင့်ကောက်ခံလာရခြင်း ဖြစ်သည်။တာချီလိတ်-ကျိုင်းတုံ ပြေးဆွဲသည့် ယာဉ်စီးခမှာ ယခင်က ထိုင်းဘတ်ငွေ ၂၆၀ သာ ရှိရာမှ မတ်လ ၇ ရက်မှစ၍ ဘတ် ၃၆၀ အထိ မြင့်တက်လာသည်။ ထို့အတူ တာချီလိတ်-မိုင်းတုံ ကားခမှာလည်း ယခင်က ဘတ် ၆၀၀ မှ ယခုအခါ ဘတ် ၁,၂၀၀ အထိ နှစ်ဆ မြင့်တက်သွားကြောင်း သိရသည်။မိုင်းဆတ်-တောင်ကြီး လမ်းကြောင်းတွင်လည်း ယခင်က ရှေ့ခန်း ကျပ်တစ်သိန်း၊ နောက်ခန်း ၈ သောင်းခွဲသာ ရှိခဲ့သော်လည်း ယခုအခါ မည်သည့်ထိုင်ခုံမှစီးစီး တစ်ဦးလျှင် ကျပ်တစ်သိန်းခွဲအထိ ပေါက်ဈေးရှိနေကြောင်း၊ Probox ကားငယ်များမှာလည်း ခရီးသည် ၅ ဦးပြည့်မှသာ ပြေးဆွဲနိုင်သည့် အခြေအနေဖြစ်နေကြောင်း ကားသမားများက ဆိုသည်။စက်သုံးဆီဈေးနှုန်းများမှာ ဓာတ်ဆီတစ်လီတာလျှင် ကျပ် ၃,၅၀၀ မှ ယခုအခါ ကျပ် ၇,၀၀၀ ခန့်အထိ နှစ်ဆနီးပါး မြင့်တက်လာပြီး လိုသလောက် ဝယ်ယူ၍မရသည့် အခြေအနေဖြစ်နေသည်။
