တာချီလိတ်မြို့မှတစ်ဆင့် ထိုင်းနိုင်ငံသို့ တင်ပို့နေသည့် ထောပတ်သီးများကို ထိုင်းနိုင်ငံဘက်မှ အဝင်မခံတော့သဖြင့် တင်ပို့သူကုန်သည်များ အမြောက်အမြား အရှုံးပေါ်နေကြောင်း ကုန်သည်များထံမှ သိရသည်။ယင်းထောပတ်သီးများကို ပြီးခဲ့သည့် ဖေဖော်ဝါရီလကုန်အထိ ပုံမှန်တင်သွင်းခွင့်ရရှိခဲ့သော်လည်း မတ်လဆန်းပိုင်းမှစ၍ ထိုင်းအကောက်ခွန်ဌာနက တင်သွင်းမှုကို ရုတ်တရက် ပိတ်ပင်လိုက်ခြင်းဖြစ်ကြောင်း ကုန်သည်များထံမှ သိရသည်။၂၅ ကီလိုဂရမ်ပါ ထောပတ်သီးတစ်ဖာလျှင် အရင်းဈေး ကျပ် ၂ သိန်းခွဲ (တစ်ကီလိုလျှင် ကျပ် တစ်သောင်းခန့်) ရှိသော်လည်း၊ ယခုအခါ တာချီလိတ်၌ တစ်ကီလိုလျှင် ထိုင်းဘတ်ငွေ ၁၀ ဘတ် (ကျပ် တစ်ထောင်ကျော်) ဖြင့်သာ ပြန်လည်ရောင်းချနေရကြောင်း၊ အချို့ကုန်သည်များမှာ ရောင်းမထွက်တော့သဖြင့် အလကားပေးဝေခြင်းနှင့် စွန့်ပစ်ခြင်းများပါ ပြုလုပ်နေကြရကြောင်း သိရသည်။ယနေ့ မတ်လ ၉ ရက် နံနက်ပိုင်းတွင် တာချီလိတ်မြို့၊ ဆေးရုံဟောင်းရှေ့၌ ထောပတ်သီးကုန်စည်ဒိုင်တစ်ခုက အချိန် ၄,၀၀၀ ကျော်ရှိသော ထောပတ်သီးများကို အများပြည်သူထံ အခမဲ့ ပေးဝေခဲ့သလို အခြားကုန်သည်တစ်ဦးကလည်း အထားမခံသဖြင့် စွန့်ပစ်ရသည့် ထောပတ်သီးများ တန်ချိန်ဆယ်ချီရှိနေပြီဖြစ်ကြောင်း ပြောသည်။
