မသန်စွမ်းသူများအားပြက်လုံးထုတ်သည့်ကိစ္စ ပြေလည်သွားပြီဟုဆို

အောင်ဇမ္ဗူဇာတ်သဘင်အဖွဲ့က မသန်စွမ်းသူများအား ပြက်လုံးထုတ် တင်ဆက်ခဲ့မှုအပေါ် ဇာတ်သဘင်အဖွဲ့ တာဝန်ရှိသူကိုယ်တိုင် လာရောက်တောင်းပန်ခဲ့ပြီးနောက် နှစ်ဦးနှစ်ဖက် နားလည်မှုရယူကာ ပြဿနာပြေလည်သွားပြီဖြစ်ကြောင်း ရွှေမင်းသားဖောင်ဒေးရှင်း(မြန်မာ) ဥက္ကဋ္ဌ ဦးမြတ်သူဝင်းက Summit Parkview Hotel ၌ ပြုလုပ်သည့် မီဒီယာတွေ့ဆုံပွဲတွင် ပြောကြားခဲ့သည်။ မသန်စွမ်းသူများသည် လူ့ဂုဏ်သိက္ခာရှိစွာ ရှင်သန်နိုင်ရန် အရေးကြီးကြောင်းနှင့် နောင်တွင် ယခုကဲ့သို့ ဖြစ်စဉ်မျိုး ထပ်မံမဖြစ်ပွားစေရန် သဘင်အစည်းအရုံး နာယကနှင့် မသန်စွမ်းအဖွဲ့အစည်းများအကြား ညှိနှိုင်းဆောင်ရွက်ခဲ့ကြသည်။ ထို့ပြင် ရွှေမင်းသားဖောင်ဒေးရှင်း(မြန်မာ) အနေဖြင့် လာမည့် ၅ နှစ်အတွင်း မသန်စွမ်းသူများ၏ ပညာရေး၊ အလုပ်အကိုင် အခွင့်အလမ်းနှင့် သဘာဝဘေးဒဏ် ကူညီတုံ့ပြန်ရေး ကဏ္ဍ (၃) ခုကို ဦးစားပေး ဆောင်ရွက်သွားရန် စီစဉ်ထားကြောင်းလည်း သိရသည်။