ထိုင်းရှိ မြန်မာလုပ်သား ၁ဝ၄ ဦး စာရွက်စာတမ်းများ သိမ်းဆည်းခံရ

ထိုင်းနိုင်ငံ၊ ချာချင်ဆောင်မြို့ရှိ ကားချည်ကြိုးထုတ်လုပ်သည့် စက်ရုံတစ်ခုတွင် အလုပ်လုပ်ကိုင်နေသော မြန်မာအလုပ်သမား ၁၀၄ ဦးသည် အချိန်ပို (OT) ကြေး အပြည့်အဝမရရှိခြင်း၊ အလုပ်ကို တစ်ရက်ဆင်းတစ်ရက်နားစနစ်ဖြင့် အလှည့်ကျပေးခြင်းနှင့် ပန်းရောင်ကတ် (ဘတ်) စာရွက်စာတမ်းများ သိမ်းဆည်းခံထားရခြင်းတို့ ကြုံတွေ့နေရကြောင်း သိရသည်။ အလုပ်သမားများသည် တစ်ရက်လျှင် ၉ နာရီ အလုပ်လုပ်ရသော်လည်း အချိန်ပိုကြေးကို သတ်မှတ်နှုန်းထားထက် လျှော့နည်းစွာရရှိနေပြီး စက်ရုံဘက်မှ စာရွက်စာတမ်းများကိုလည်း ဓာတ်ပုံရိုက်ခွင့်ပင်မပေးဘဲ သိမ်းဆည်းထားခြင်းဖြစ်သည်။ ထို့ကြောင့် အလုပ်သမားများသည် ၎င်းတို့၏ အခွင့်အရေးများ ပြန်လည်ရရှိရန် WAG အလုပ်သမားမဟာမိတ်အဖွဲ့၏ အကူအညီဖြင့် သက်ဆိုင်ရာ မြို့နယ်အလုပ်သမားရုံး (ဆဝါဒီကန်) သို့ သွားရောက်တိုင်ကြားထားပြီး တာဝန်ရှိသူများ ကွင်းဆင်းစစ်ဆေးပေးရန် တောင်းဆိုထားကြောင်း သိရသည်။