ထိုင်းရှိNakhon Ratchasima မှာ ပြင်းထန်တဲ့ နွေရာသီမုန်တိုင်းကြောင့် ကားလမ်းရဲ့ မီတာ ၃၀၀ ( ပေ ၉၀၀ ကျော်)အကွာအဝေးတစ်လျှောက် ဓာတ်တိုင်တွေ ပြိုလဲ

မတ်လ ၅ ရက် ည ၈ နာရီဝန်းကျင်မှာ Nakhon Ratchasima ဘက်ကို ဦးတည်သွားတဲ့ အမှတ် ၆ အမြန်လမ်းမကြီး (M6) ပေါ်မှာ ထိတ်လန့်ဖွယ်ရာ ဖြစ်ရပ်တစ်ခု ဖြစ်ပွားခဲ့ပါတယ်။ ပြင်းထန်တဲ့ နွေရာသီမုန်တိုင်း တိုက်ခတ်မှုကြောင့် ဗို့အားမြင့် လျှပ်စစ်ဓာတ်တိုင်တွေဟာ လေပြင်းဒဏ်ကို မခံနိုင်ဘဲ မီတာ ၃၀၀ ကျော်အထိ လမ်းဘေးကာရံထားတဲ့ သံလမ်းတွေပေါ်ကို ပြိုလဲကျခဲ့ပါတယ်။ဒီဖြစ်စဉ်ဟာ Kham Thale So တိုးဂိတ်မရောက်ခင် ကီလိုမီတာ ၁၈၄ မှာ ဖြစ်ပွားခဲ့တာလည်းဖြစ်ပါတယ်။ ညဘက်ဖြစ်နေတဲ့အပြင် မိုးသည်းထန်စွာ ရွာသွန်းနေပြီး အမြင်အာရုံ မရှင်းလင်းတဲ့အတွက် အဲဒီအချိန်က လမ်းဖြတ်ကူးနေတဲ့ ခရီးသွားတွေကြားမှာ အတော်လေး စိုးရိမ်ထိတ်လန့်ခဲ့ရပါတယ်။ ဖြစ်စဉ်ဖြစ်ပွားပြီးနောက်မှာတော့ အမြန်လမ်းရဲတပ်ဖွဲ့၊ Nakhon Ratchasima ဒေသခံလမ်းတံတားဦးစီးဌာနနဲ့ ပြည်နယ်လျှပ်စစ်ဓာတ်အားပေးရေးအဖွဲ့တွေ ပူးပေါင်းပြီး အခင်းဖြစ်ပွားရာနေရာကို ချက်ချင်း သွားရောက်စစ်ဆေးခဲ့ပါတယ်။ပြိုလဲနေတဲ့ ဓာတ်တိုင်တွေကြောင့် ကြီးမားတဲ့ ယာဉ်မတော်တဆမှုတွေ မဖြစ်အောင် တာဝန်ရှိသူတွေက မီတာ ၅၀၀ ကျော်အထိ အတားအဆီးတွေ၊ အလင်းပြန်ကတော့တွေ ချထားပေးခဲ့ပြီး ယာဉ်မောင်းတွေ အရှိန်လျှော့ဖို့ သတိပေးမီးတွေ ဖွင့်ထားပေးခဲ့ပါတယ်။ လတ်တလောမှာတော့ တာဝန်ရှိသူတွေက ပြိုလဲနေတဲ့ ဓာတ်တိုင်တွေကို ဖယ်ရှားပြီး နေရာရှင်းလင်းရေးတွေကို အရေးပေါ် လုပ်ဆောင်နေပါတယ်။ ဒါကြောင့် ကိုရတ် (Korat) ဘက်ကို ဦးတည်မယ့် M6 အမြန်လမ်းကို အသုံးပြုမယ့် ယာဉ်မောင်းတွေအနေနဲ့ အထူးသတိထားမောင်းနှင်ဖို့ ဒါမှမဟုတ် မလိုအပ်ရင် အဲဒီလမ်းကြောင်းကို ရှောင်ရှားကြဖို့ အကြံပြုထားပါတယ်။M6 အမြန်လမ်းပေါ်က ဖြစ်စဉ်ဟာ လက်ရှိ အရှေ့မြောက်ပိုင်းဒေသမှာ တိုက်ခတ်နေတဲ့ နွေရာသီမုန်တိုင်းကြောင့် ပျက်စီးဆုံးရှုံးမှုတွေထဲက တစ်စိတ်တစ်ပိုင်းသာ ဖြစ်ပါတယ်။ ထိုင်းမိုးလေဝသဌာနကလည်း အချို့နေရာတွေမှာ မိုးကြိုးပစ်တာ၊ လေပြင်းတိုက်ခတ်တာနဲ့ မိုးသီးကြွေတာတွေ ဖြစ်လာနိုင်တယ်လို့ သတိပေးချက် ထုတ်ပြန်ထားပါတယ်။ ဒါကြောင့် ဒီကာလအတွင်း နယ်ဝေးခရီးသွားမယ့်သူတွေအနေနဲ့ လုံခြုံရေးအတွက် ရာသီဥတုအခြေအနေကို စစ်ဆေးပြီး ဂရုတစိုက် ကြိုတင်စီစဉ်ကြဖို့ အကြံပြုထားပါတယ်။