ရီးယဲလ်မက်ဒရစ်တိုက်စစ်မှူး အမ်ဘာပေရဲ့ဒူးဒဏ်ရာဟာ ခွဲစိတ်ကုသဖို့ မလိုအပ်ဘူးလို့ သိရပါတယ်။အမ်ဘာပေ(၂၇ နှစ်)ဟာ ၂၀၂၅ ခုနှစ်ကုန်ကတည်းက ဘယ်ဘက်ဒူးဒဏ်ရာ ခံစားနေရတာဖြစ်တယ်။၎င်းဟာ ပါရီကို သွားရောက်ကာ ဒူးဒဏ်ရာနဲ့ပတ်သက်ပြီး စမ်းသပ်စစ်ဆေးမှုတွေ ခံယူခဲ့ပါတယ်။ဒါကြောင့် ဘင်ဖီကာအသင်းနဲ့ကစားတဲ့ ချန်ပီယံလိဂ် play-off ဒုတိယအကျော့ပွဲ၊ ဂီတာဖေးနဲ့ လာလီဂါအိမ်ကွင်းပွဲတွေကို လွဲချော်ခဲ့ရပါတယ်။အမ်ဘာပေအနေနဲ့ လာမယ့်အပတ် မန်စီးတီးအသင်းနဲ့ ချန်ပီယံလိဂ် ၁၆ သင်းအဆင့် ပထမအကျော့ပွဲမှာလည်း ပါဝင်ကစားဖို့ မသေချာပါဘူး။အမ်ဘာပေရဲ့ကိုယ်စားလှယ်တွေက ကစားသမားဟာ ပါရီမှာ ရီးယဲလ်ဆေးအဖွဲ့ဝင်တွေနဲ့ အတူရှိနေတယ်လို့ ပြောခဲ့ပါတယ်။
