၂၀၂၆ အာဆီယံအမျိုးသမီးဖူဆယ်ချန်ပီယံရှစ်ပြိုင်ပွဲကို ဝင်ရောက်ယှဥ်ပြိုင်ခဲ့တဲ့ မြန်မာအမျိုးသမီးဖူဆယ်အသင်းဟာ အုပ်စုတွင်း (၃) ပွဲစလုံး ရှုံးနိမ့်ပြီး အိမ်ပြန်ခဲ့ရပါတယ်။မြန်မာအမျိုးသမီးအသင်းဟာ အုပ်စုအဆင့်မှာ သြစတြေးလျ၊ ဗီယက်နမ်၊ ဖိလစ်ပိုင်အသင်းတွေနဲ့အတူကျရောက်ခဲ့ပါတယ်။ မြန်မာအမျိုးသမီးအသင်းဟာ အုပ်စုတွင်းမှာ ဖိလစ်ပိုင်အသင်းကို (၀-၁) ဂိုး၊ သြစတြေးလျအသင်းကို (၁-၆) ဂိုး၊ ဗီယက်နမ်အသင်းကို (၂-၅) ဂိုးတွေနဲ့ ရှုံးနိမ့်ပြီး အုပ်စုက ထွက်ခဲ့ရတာဖြစ်ပါတယ်။၂၀၂၆ အာဆီယံအမျိုးသမီးဖူဆယ်ချန်ပီယံရှစ်ပြိုင်ပွဲကို ပြီးခဲ့တဲ့ဖေဖော်ဝါရီ (၂၄) ရက်ကစပြီး ထိုင်းနိုင်ငံက အိမ်ရှင်အဖြစ် လက်ခံကျင်းပနေတာဖြစ်ပါတယ်။ မြန်မာအမျိုးသမီးအသင်းကို ပြည်တွင်းနည်းပြ ဒေါ်ဝါဝါခိုင်က တာဝန်ယူကိုင်တွယ်နေတာဖြစ်ပါတယ်။
မြန်မာအမျိုးသမီးအသင်းဟာ ပြီးခဲ့တဲ့ ၂၀၂၅ ထိုင်းဆီးဂိမ်းစ်အမျိုးသမီးဖူဆယ်ပြိုင်ပွဲမှာလည်း အုပ်စုတွင်းမှာ အင်ဒိုနီးရှားအသင်းကို (၀-၄) ဂိုး၊ ဗီယက်နမ်အသင်းကို (၂-၄) ဂိုးတွေနဲ့ ရှုံးနိမ့်ထားခဲ့ပါတယ်။ အာဆီယံဘောလုံးအဖွဲ့ချုပ် (AFF) ဟာ အာဆီယံအမျိုးသမီးဖူဆယ်ချန်ပီယံရှစ်ပြိုင်ပွဲကို ၂၀၂၄ ခုနှစ်က ပထမအကြိမ်ကျင်းပခဲ့ပြီး အခု ၂၀၂၆ ခုနှစ်မှာ ဒုတိယအကြိမ် ကျင်းပတာဖြစ်ပါတယ်။ ၂၀၂၄ ခုနှစ် ပထမအကြိမ်ပြိုင်ပွဲတုန်းက မြန်မာအမျိုးသမီးအသင်းဟာ စတုတ္ထနေရာ ရရှိခဲ့ပါတယ်။
