၅ နှစ်အတွင်း လျှို့ဝှက်လက်နက်သစ်များနှင့် ဂြိုဟ်တုဖျက်နည်းပညာများ ထုတ်ဖော်မည်ဟု ကင်ဂျုံအန်း ကြေညာ

မြောက်ကိုရီးယားခေါင်းဆောင် ကင်ဂျုံအန်းက လာမည့် ၅ နှစ်တာကာလအတွင်း ရန်သူများ မလိုက်နိုင်သည့်အဆင့်အထိ အမျိုးသားကာကွယ်ရေးစွမ်းအား မြှင့်တင်ရန်အတွက် လျှို့ဝှက်မဟာဗျူဟာမြောက် လက်နက်သစ်များကို တီထွင်ထုတ်လုပ်သွားမည်ဟု ကိုရီးယားအလုပ်သမားပါတီ၏ (၉) ကြိမ်မြောက် ကွန်ဂရက်တွင် ပြောကြားလိုက်သည်။ အဆိုပါစီမံကိန်းတွင် မြေပြင်နှင့် ရေငုပ်သင်္ဘောသုံး တိုက်ချင်းပစ်ပဲ့ထိန်းဒုံးကျည် (ICBM) များ၊ AI စနစ်သုံး လူမဲ့တိုက်ခိုက်ရေးယာဉ်များ၊ ရန်သူ့ဂြိုဟ်တုများကို ပစ်မှတ်ထားမည့် အထူးလက်နက်များနှင့် အဆင့်မြင့်ထောက်လှမ်းရေးဂြိုဟ်တုများ ပါဝင်ပြီး၊ ၆၀၀ မီလီမီတာနှင့် ၂၄၀ မီလီမီတာအဆင့်ရှိ ဒုံးပစ်စင်များကိုလည်း နှစ်စဉ်တိုးမြှင့်တပ်ဖြန့်ကာ စစ်ဆင်ရေးစွမ်းရည်ကို အဆမတန်မြှင့်တင်သွားမည်ဟု အသေးစိတ်ထုတ်ဖော်ပြောဆိုခဲ့သည်။