ဘန်ကောက်မြို့တော်အုပ်ချုပ်ရေးဌာနက အပူချိန်အလွန်မြင့်မားနေတဲ့အတွက် အပူရှပ်နိုင်တယ်လို့ သတိပေး

ဘန်ကောက်မြို့တော် အုပ်ချုပ်ရေးဌာန(BMA) က အပူရှပ်တဲ့ရောဂါ ဖြစ်ပွားမှုတွေ မြင့်တက်လာမှာကို စိုးရိမ်တဲ့အတွက် ပြည်သူတွေကို ပြင်းထန်တဲ့ အပူဒဏ်ကနေ ကာကွယ်ဖို့ အစီအမံတွေကို တိုးမြှင့်လုပ်ဆောင်နေပါတယ်။ တာဝန်ရှိသူတွေက ပြည်သူ့ကျန်းမာရေးကို ထိခိုက်စေနိုင်တဲ့ ရာသီဥတုအခြေအနေတွေနဲ့ အပူချိန်ပြောင်းလဲမှုတွေကို စောင့်ကြည့်နေပြီး အထူးသဖြင့် ကလေးငယ်တွေ၊ ကိုယ်ဝန်ဆောင်တွေ၊ သက်ကြီးရွယ်အိုတွေနဲ့ ရောဂါအခံရှိသူတွေလို ထိခိုက်လွယ်တဲ့ အုပ်စုတွေကို သတိပေးချက်တွေ ထုတ်ပြန်ထားပါတယ်။အပူချိန်အလွန်မြင့်မားနေတဲ့အတွက် အပူရှပ်နိုင်တယ်လို့ တာဝန်ရှိသူတွေက ဖေဖော်ဝါရီလ ၂၆ ရက်နေ့မှာ သတိပေးထားပါတယ်။ ဒါကြောင့် ပြည်သူတွေအနေနဲ့ အပူချိန်အမြင့်ဆုံးအချိန်တွေမှာ ပြင်းထန်တဲ့ ပြင်ပလှုပ်ရှားမှုတွေကို ရှောင်ကြဉ်ဖို့၊ ရေများများသောက်ဖို့၊ ပေါ့ပါးတဲ့ အဝတ်အစားတွေ ဝတ်ဆင်ဖို့နဲ့ နေလောင်ဒဏ်ကာကွယ်ရေး ပစ္စည်းတွေ အသုံးပြုဖို့ အကြံပြုထားပါတယ်။ အပူရှပ်ခြင်းရဲ့ လက္ခဏာတွေမှာ ခန္ဓာကိုယ်အပူချိန် ၄၀-၄၁ ဒီဂရီဆဲလ်စီးယပ်စ်ထက် ကျော်လွန်တာ၊ ပြင်းထန်စွာ ခေါင်းကိုက်တာ၊ ပျို့အန်တာ၊ ကြွက်တက်တာ၊ အသက်ရှူမြန်တာ၊ ရင်တုန်တာ၊ သွေးပေါင်ကျတာနဲ့ မေ့လဲတာတွေ ပါဝင်ပါတယ်။