စင်ကာပူတွင် ဘာဂါနှင့် ကြက်ကြော် လုယူခဲ့သည့် အမျိုးသားကို ရုံးထုတ်စစ်ဆေး၊ ထောင်ဒဏ် ၇ နှစ်အထိ ကျခံရနိုင်

စင်ကာပူနိုင်ငံ၊ Sembawang ရှိ Sun Plaza ဈေးဝယ်စင်တာရှေ့တွင် မောင်နှမနှစ်ဦးထံမှ McDonald's ဘာဂါနှင့် ကြက်ကြော်ထုပ်ကို အတင်းအဓမ္မလုယူခဲ့သူ အသက် ၄၁ နှစ်အရွယ် Mohammad Hisyam Basheer ကို ၂၀၂၆ ခုနှစ် ဖေဖော်ဝါရီလ ၂၃ ရက်တွင် ရုံးထုတ်စစ်ဆေးခဲ့ကြောင်း သိရသည်။ ပြီးခဲ့သည့် ၂၀၂၅ ခုနှစ် မေလအတွင်းက ဖြစ်ပွားခဲ့သော အဆိုပါအမှုတွင် တရားခံသည် ယခင်ကလည်း Burger King ဆိုင်၌ ဆူပူသောင်းကျန်းဖူးသည့် ရာဇဝင်ရှိသူဖြစ်ပြီး ရုံးတော်တွင် စစ်ဆေးစဉ်အတွင်း မေးခွန်းများကို ပြန်မဖြေဘဲ ပုခုံးတွန့်ပြခြင်း၊ အာရပ်ဘာသာစကားဖြင့်သာ ပြောဆိုလိုကြောင်း တောင်းဆိုခြင်းစသည့် ထူးဆန်းသော အမူအရာများကို ပြုလုပ်ခဲ့သည်။ လက်ရှိတွင် ၎င်းကို အမှုဖွင့်တရားစွဲဆိုထားပြီး အပြစ်ရှိကြောင်း ထင်ရှားပါက အနည်းဆုံး ထောင်ဒဏ် ၁ နှစ်မှ အများဆုံး ၇ နှစ်အထိ ကျခံရနိုင်သည့်အပြင် ကြိမ်ဒဏ်ပါ ပေးဆောင်ရနိုင်ခြေရှိကြောင်း သိရသည်။