နေပြည်တော် ပြည်ထောင်စုနယ်မြေအတွင်းရှိ တပ်ကုန်းမြို့နယ်၊ ဒက္ခိဏသီရိမြို့နယ်နဲ့ လယ်ဝေးမြို့နယ်တို့မှာ မနေ့ ဖေဖော်ဝါရီ ၂၁ ရက်၊ ညနေပိုင်းက လေပြင်းတိုက်ခတ်မှု ဖြစ်ပွားခဲ့ပြီး နေအိမ် စုစုပေါင်း ၄၅၉ လုံးနဲ့ စာသင်ကျောင်း တကျောင်း ပျက်စီးခဲ့တယ်လို့ ဒေသအခြေစိုက် မီးသတ်တပ်ဖွဲ့ဝင်တွေဆီက သိရပါတယ်။တပ်ကုန်းမြို့နယ်မှာ မနေ့ ညနေ ၆ နာရီခွဲဝန်းကျင်က လေပြင်း တိုက်ခတ်မှုကြောင့် ကျောက်စရစ်ကုန်းကျေးရွာရှိ အိမ်ခြေ ၁၆ လုံး၊ ထုံးဖိုကျေးရွာရှိ အိမ်ခြေ ၄၃ လုံးနဲ့ စာသင်ကျောင်း တကျောင်း ပျက်စီးခဲ့တယ်လို့ သိရပါတယ်။အဲဒီလိုပဲ လယ်ဝေးမြို့နယ်မှာလည်း မနေ့ ညနေ ၄ နာရီ ၄၅ မိနစ်ဝန်းကျင်က လေပြင်းတိုက်ခတ်မှု ဖြစ်ပွားခဲ့ပြီး ကျေးရွာပေါင်း ၃၈ ရွာက နေအိမ် ၂၃ လုံး ပြိုကျပျက်စီးခဲ့ကာ နေအိမ် ၃၀၅ လုံး
အမိုးလန် ပျက်စီးသွားခဲ့တယ်လို့ သိရပါတယ်။အဲဒီလိုပဲ ဒက္ခိဏသီရိမြို့နယ်မှာလည်း မနေ့ ညနေ ၄ နာရီခွဲဝန်းကျင်က လေပြင်းတိုက်ခတ်မှု ဖြစ်ပွားခဲ့ပြီး ဇီးဖြူကုန်းကျေးရွာက နေအိမ် ကိုးလုံး၊ ညောင်ကုန်းကျေးရွာက နေအိမ် ခုနစ်လုံး၊ ဆည်စုကျေးရွာက နေအိမ် ၆၂ လုံး၊ ဒိုးနွယ်ကျေးရွာက နေအိမ် သုံးလုံး၊ စုစုပေါင်း ၈၁ လုံး ပျက်စီးခဲ့တယ်လို့ သိရပါတယ်။
